Hunonga ang pagsaway

Dili sayon ang gihimo ni Gilbert Bargayo nga pagpalansang niya sa krus kaniadtong Biyernes Santo aron sa paglab-as pagbalik sa nahitabo ni Ginoong Hesukristo didto sa bukid sa Golgotha kaliboan na ka tuig ang milabay

Dunay mga nanaway kang Bargayo sa pagpalansang niya sa krus sa matag Biyernes Santo kay lagi kuno, gihimo lang kini aron makakwarta gikan sa mga opisyal sa lungsod nga mobayad kaniya aron adto kini himoa ang kalihokan sa ilang dapit.

Buyno, matinuod man o dili ang ilang pagduda, para nako dili na lang kini angay’ng hisgotan ug sawayon si Bargayo. Dili ra si Bargayo ang nagpalansang sa krus dinhi sa nasud kaniadtong Biyernes Santo.

Sigurado sab ko nga ang mga nanaway kang Bargayo dili gyud magpalansang bisan og hatagan pa sila’g usa ka milyon ka pesos.

Bisan tuod og hilabihan ka talinggab sa lansang nga gigamit, ug dali ra kaayo motagdoy sa iyang pad ug tiil, apan sakit gihapon.

Nakakita man gyud ko paglansang ni Bargayo, makaingon ko nga ang sa tiil menos-menos ra ang sakit kay anaa man kini gipatagdoy ang lansang sa taliwala sa gingit sa kumagko ug sa sunod nga kuyamoy. Apan ang paglansang sa pad, anaa gyud sa tunga.

Aw hinoon, dili basta-basta ang paglansang kay giayo man gyud paghikap nga ang lansang dili moigo sa bukog. Gibutangan na daan og marker kon asa ig-on sa paglansang, pero sakit gyud gihapon.

Kon si Bargayo makakwarta man bugti sa iyang pagpalansdang gikan sa posibleng mga politiko nga mohatag kaniya’g pahinungod, ug niadtong mohatag og mga donasyon, dili na kini angay’ng sawayon pa.

Usbon ko, dili sayon ang pagpalansang sa krus. Ang ako lang hinuon nga ikasugyot nga sa sunod tuig, kon sa ika-31 ka higayon magpalansang pa gihapon si Bargayo, maayong ang paglansang kaniya sa krus anha gyud himoa sa pagsugod pa lang sa Siete Palabras.

Kinahanglang inigsugod sa Siete Palabras, anaa na si Bargayo nagbitay sa krus ug sa iyang masi’g ka kilid, anaa sila si Estas ug Barabas. Sa ingon nga paagi, mosamot ka solemne ang kalihokan.

* * *

Sa laing bahin, pasalamatan nako ang kapolisan, ang PROBE, ang Cebu City Transportation Office (CCTO) nga gisikop dayon nila ang mga batan-on nga manglabay og bato sa mga sakyanan nga moagi sa viaduct dapit sa Barangay Pasil.

Para nako, angay’ng patagmon ang maong mga batan-on, pero dili lang ko mosulti og unsay angay’ng himoon. Dili komedya ang ilang gihimo nga panglabayon og bato ang mga sakyanan nga moagi, unya kon mohunong ang nagsakay, mangambak lang dayon sa dagat.