Kinsay buhian, kinsay ilansang?

Palm Sunday na usab. Tigbendita sa mga lukay. Kon pila nay imong edad karon, mao pod kini ang gidugayon nga gihatagan ta sa Ginoo og kahigayonan sa hingpit nang pagbiya sa atong kasal-anan, pinaagi sa pagpamalandong giunsa nato pagtubag ang Iyang mga inadlawng eksam o suliran sa atong kinabuhi?

Nagpabilin ba kita sa atong hugot nga pagtuo ug pagsalig Kaniya?  Or, gibati dayon tag kakapoy ug padayong nagpatental na lang sa yawa?

Ang Palm Sunday maoy unang adlaw sa Semana Santa, nga maoy pag-abot ni Hesus sa Jerusalem sakay sa usa ka donkey, diin gisugat siya sa daghang Kristiyanos nga nanagdalag mga lukay, miwarawara-mipahaklap niini sa yuta, agig pagyukbo sa giila nilang Mesiyas, Mangluluwas ang hari sa tanang hari nga hagbay rang gipaila pinaagi sa mga propeta.

Nahimong usa ka malipayon ug magul-anon ang kapistahan sa maong adlaw.

Kay miabot man tuod og Domingo ang Mesiyas ug Mangluluwas, pero pag-abot sa adlawng Biyernes (Biyernes Santo), ilansang ug mamatay ra diay sa krus.

Kahinumdoman, dihang gidakop si Hesus sa mga Hudeyo, unya gipresentar ni Ponsiyo Pilato atubangan sa daghang katawhan, diin human makapanghugas sa iyang mga kamot ug katawhan nay iyang gitugyanan sa paghukom, siya nangutana: “Kinsa bay gusto ninyong akong buhian: si Barabas (usa ka notadong kriminal), o si Hesus nga gitawag og Mesiyas?”

Milanog ilang tubag: “Si Barabas! Si Barabas!” Unya, human buhii si Barabas, ug si Hesus maoy gibilin, sila masuk-anong nagdungan pagsinggit: “Ilansang Siya sa krus! Ilansang Siya sa krus!”

Morag gipanglapsan og punyal ang kasingkasing sa milyonmilyong diehard Duterte supporter ug good governance lovers, kinsa nakasaksi giunsa pag-aresto si kanhi Presidente Rodrigo Roa Duterte (PRRD) sa mga mangtas mananakop nga mga Pinoy ra man usab unta, apan mipaila sa ilang kahawod ug mipakasama na lang ni PRRD nga hugawng nuog sa ilang panan-aw. Busa, gisayonsayon-dalidali nilag padala-dan-ok ngadto sa nagngangang detention facility sa ICC, The Hague, Netherlands.

Ang gibuhat sa mga Hudeyo ngadto sa atong Ginoong Hesus, kaamgid kaayo sa gihimo sa administrasiyong Marcos ngadto kang PRRD. Diin, inay ang mga mananakop maoy dapat ibalhog sa bilanggoan, nagpabilin hinuong gawasnon ug nahimo pang sobra kagamhanan!  

Makatulo sa luha, uy!