Wala dawata ang pahiyom

Gibutyag sa Department of Budget and Management nga na-release na niini ngadto sa nagkalain-laing mga ahensiya ang mokabat 80.70% (P5.11 trillion sa P6.326 trillion) sa 2025 national budget sa katapusan sa Marso.  Ang labing dako nga pahat (P1.11 trillion) nahatag ngadto sa DPWH.  Nanimahong “kagwang” kining kapaspas sa DBM mopagawas sa kwarta labi na kay nagsingabot ang eleksyon.  Way kaso kay katawhan ra man ang mabuktot og binayad sa buhis.  Matud pa sa akong amigo, “Ingon ang gobyerno, mobayad kita’g buhis uban ang pahiyom; apan wala man dawata sa BIR ang akong pahiyom kay kwarta lang kuno ila.” Fezteleern!

 Nagpabilin’g buta

Giawhag sa Federation of Free Farmers (FFF) ang kagamhanan nga mo-imponer og floor price sa palay (tipasi) sa tag-P20 ang matag kilo aron mapugngan ang pagkunhod sa presyo niini gumikan sa nagbaha nga imported nga bugas.  Bukas ang Department of Agriculture (DA) sa maong awhag apan daling nakahanig nga kumplikado ang maong isyu. Paminawon unta sa kagamhanan ang mga mag-uuma kay sila man ang labing apektado niini.  Kining pagmagahi ug pagpalingog-lingog sa DA makapahinumdum sa linya sa awit nga nagkanayon, “Wala’y pulos ang talâ sa atong mga mata kon sa kasingkasing magpabilin ‘tang buta.”  Muleeng!

“Present” or “not guilty”?

Mibuhi og hait nga pulong si Senate President Francis Chiz Escudero batok kang Senador Imee Marcos sa pag-ingon nga likayan sa naulahi ang pag-gamit sa senado isip lusaranan sa iyang mga politikal nga katuyoan.  “In aid of legislation” kunohay ang katuyoan sa mga public hearing.  Apan sayod ang katawhan nga pulos grandstanding lang ang tanan. Daw wala ma’y balaodnon nga naumol sa daghan’g hearing nga gipahigayon.  Haum ang pagya-komedya nga, "Sa panahon sa committee hearing, inig tawag sa roll call, maglibog ang mga senador (kongresista) kon motubag ba sila og “present” o “not guilty”.”  Madahaan!

 Lipat-lipat lang

Namahayag ang COMELEC nga gitutokan nila karon ang 36 ka kaso sa giingon’g vote buying dungan usab sa pagpunting sa ilang panan-aw ngadto sa mga dili makiangayon nga mga binuhatan sa mga kandidato ni’ng nagdulong nga May 12 midterm elections. Sagad nga masilotan sa COMELEC ni’ng ilang kampanya batok sa vote-buying kay kadto lamang mga walay ikasarang.  Apan buta ug bungol ang COMELEC sa tataw nga vote-buying nga gihimo sa mga kandidato sa administrasyon nga gitakubanan lang sa mga letrang AKAP, TUPAD, AICS ug uban pa.  Komento pa sa akong amigo, “Kining gibuhat sa COMELEC, mora’g duwa sa peryahan nga ‘lipat-lipat lang’.” Ateerr!

 Na-‘nguhong’ ang pagsaway

Bukas si Mayor Raymond Alvin Garcia nga repasohon ang viability sa mushroom growing livelihood program sa dakbayan sa Sugbo luyo sa pagsaway ug komento nga dili sayon ang pagpatubo sa mga mushroom (uhong/libgos).  Dili tinuod tiaw kining programaha nga gigahinan gyud og minilyon ka pesos sa dakbayan busa kinahanglan tun-an pag-ayo.  Mao kanay giingon nga, “Sa kagustohan sa dakbayan nga maimplementar gilayon ang maong programa, nanguhong ug nanglibgos hinoon ang mga pangutana ug pagsaway.” Pagkatoytoy!