EDITORYAL - Lokal nga pag-endorso

Endorsar diri, endorser didto. Mao kini ang mga panghitabo sa nagkadaiyang dapit sa nasud karon. Ang mga kandidato sa mga posisyon nasudnong gobiyerno nagsusory-suroy na sa lain-laing mga dapit aron mangampanya para sa eleksyon karong Mayo 12.

Bisan ang mga sikat ug ilado na nga mga kandidato walay kumpiyansa, kinahanglan sab nilang mokamas og kampanya para makita sa publiko.

Dili garantiya nga nakahibalo ang mga tawo sa ilang pangalan, mas dako ang punots kun personal gyud nilang makahimamat ang tawong gustong magpabotar.

Samut na para sa mga kandidatong mga “wa-el” o wala mailhi sa mga tawo. Kadtong mga politikong medyo tabangonon ang kandidatora nagkinahanglan og mopaluyo gikan sa mga lokal nga kandidato.

Unsa kadako ang matabang aning local endorsement para sa mga kandidato sa national race? Dako kaayo, kay ang mga lokal nga mga politiko maoy mo-validate sa usa ka national candidate.

Ang mga lokal nga politiko, ilabi na kadtong mga incumbent officials nga magpasubli sa katungdanan dunay kaugaling mga supporters. Kun sila mopaila-ila aning mga national candidates ngadto sa ilang mga supporters may tsansang botaran sab sila niini.

Husto ba nga tanang incumbent officials  nga makonsiderar nga naa sa gobiyerno karon kinahanglang suportahan ang tibuok slate sa partido sa naglingkod nga presidente sa nasud? Dili na ba sila pwede mo-endorsar og mga kandidato gikan sa oposisyon?

Una sa tanan kaning politika sa Pilipinas lahi sa uban. Ang mga lokal nga kandidato kinahanglang motuman sa kun unsay mando sa presidente, natural apil ani ang kagustohan sa ilang political party.

Kay kun dili, dunay posibilidad nga maglisod unya sila pagpangayo sa mga kinahanglan sa ilang konstituwente. Apan sa panahon sa eleksyon, panahon kini sa pagpanudya ug pagbarog sa kun unsay mas makatabang sa mga konstituwente.

Mao kini ang angay isipon ug ikonsiderar sa mga lokal nga kandidato pagsuporta og national candidates.