EDITORYAL— Kinaiyang paluoy-luoy effect

Kung obserbahan og maayo ang kinaiya sa mga Pilipino, dunay partikular nga karakter sa salida o pelikula silang gisunod o gustong sun-on. Ganahan kaayo og posisyon nga maoy linupig o dinaog-daog.

Bisan sa pagtan-aw sa tinuod nga kinabuhi, dili gyud mawala sa mga Pilipino ang magpaluoy-luoy sa halos tanang sitwasyon.

Sa mga paugnat sa kusog, sa mga kompetisyon, ug uban pa, kanunay gyud dad-on ang estorya sa kinabuhi nga siya kabus ug makaluluoy, murag nangita og simpatiya sa mga hurado ug mga tawo.

Gusto nato kanunay nga kaluy-an ta, o nangita kita pirme og bayani para mosalbar kanato o molaban para nato, imbes nga mobarug sa kaugalingon modaog man o mapildi.

Usahay dili na maayong paminawon nga kanunay dad-on ang “paluoy-luoy effect.”  Mura na og halos tanan nalang mga nanimpalad didto sa gawas parehas  tanan og sitwasyon nga unta dili man kini maoy tinuod.

Ang ubang mga nasud duna man say mga mapait nga kaagi ug naa sab sa mas grabe pang sitwasyon sa kalisdanan.

Apan dalaygon kaayo sila kay dili sila sama sa mga Pilipino kay dili sila gustong pakauwawan ilang kaugalingon ug ang ilang nasud.

Ang ubang langyaw hilom nga naningkamot sila pagbarog sa kaugalingong paningkamot  dili sila modawat nga tungod sa kaluoy nilampos sila. Importante kanila ang dungog.

Kining paluoy-luoy effect gipuhonanan og dako sa mga politiko matag eleksyon, paborable kaayo nila aron makadaog.

Magpabida-bida ug magpakabayani–bayani, magpaisog-isog, ug mosaad og mga butang nga dili matuman kay sa mata sa mga botante nga nangita og super hero, maayo nalang ni kaysa walay naminaw nila. Nalimot sila nga dili kini ang solusyon. Kinahanglan sa Pilipino mobarug ug mopilig mga lider nga naghunahuna sa nasud sa kinatibuk-an niini ug dili lang sa mga tawo.