EDITORYAL — Marami pang kasama si May Grace Piattos
MARAMI pa palang kasama sina Mary Grace Piattos, Kokoy Villamin, Fernando Tempura, Carlos Miguel Oishi, Reymunda Jane Nova, Chippy McDonald, Pia Piatos-Lim, Renan Piatos at Xiaome Ocho. Lumutang pa ang mga pangalan nina Jay Kamote, Miggy Mango, Dodong Alcala, Dodong Bina, Dodong Bunal, Dodong Darong, at Dodong S. Barok.
Ang mga bagong pangalan ay nadiskubre ni House Deputy Majority Leader Paolo Ortega V. Sabi ni Ortega noong Sabado, ang pagkakadiskubre sa mga bagong kahina-hinalang pangalan ay lalong nagpalakas sa alegasyon na talagang may hindi tamang paggamit sa P612.5 milyong confidential funds ni Vice President Sara Duterte. Ayon kay Ortega, ang pangalang “Jay Kamote” ay katunog ng pangalan ng root crop samantalang ang “Miggy Mango” ay kahawig ng prutas. Nadagdag pa umano ang “Dodong Gang”.
Tinapos ng House committee on good government and public accountability noong Disyembre 2024, ang pag-iimbestiga sa hindi maipaliwanag na paggastos ng pondo ng Office of the Vice President (OVP), Department of Education (DepEd) at confidential funds.
Nakagugulat na mayroon pa palang mga pangalan na lulutang at pawang mga “kathang-isip” din. Lumalabas na marami talagang huwad na pangalan na ginamit na recipient. Sa pagdinig ng House, maraming katanungan ang hindi nasagot partikular ang P125 million confidential funds na ginastos noong 2022 sa loob lamang ng 11 araw. Nakapagtataka kung bakit tinapos agad ang pag-iimbestiga gayung may pangalan pa palang lulutang.
Noong Disyembre 2024, sinabi ng Philippine Statistics Authority (PSA), 400 pangalan na nakapirma sa acknowledgment receipts ay wala sa kanilang data base.
Ayon sa PSA, hindi nag-e-exist ang mga pangalang Mary Grace Piattos at Kokoy Villamin. Wala itong record para sa individual’s birth, marriage at death record. Isinumite ng PSA ang kanilang findings sa House committee on good government and public accountability na nag-iimbestiga sa hindi maipaliwanag na paggastos ng pondo ng OVP at confidential fund.
Si Mary Grace Piattos at Kokoy Villamin ay kabilang sa mga signatories ng 158 acknowledgment receipts na naka-attached sa liquidation reports na isinumite ng OVP sa Commission on Audit (COA). Nang tanungin ang mga inimbitahang tauhan at opisyal ng OVP, wala silang maalalang Mary Grace Piattos.
Marami pang pangalan ang lumutang na pawang nasa acknowledgement receipts. Ang tanong ay hanggang dito na lang ba ang pag-iimbestiga? Mahahalungkat pa ba kung sino ang nasa likod ng mga inimbentong pangalan? Pera ng taumbayan ang nilustay dito kaya hindi dapat tumigil sa pag-iimbestiga.
- Latest
