Pamalandong matag Domingo

Maayong Balita

Gidala sa atong Ginoo ang pipila ka mga tinun-an niya nga suod kaayo sa iyang kasingkasing alang sa usa ka linain nga lakaw.

Tuod man nahiadto sila sa Bukid sa Tabor nga sumala sa Tradisyon ang dapit diin nahitabo ang mahimayaong pagkausab sa panagway sa atong Ginoo.

Kini ang giawag og Transfiguration ang ikaupat nga misteryo sa kahayag. Usa kini ka kasinatian sa umaabot nga panahon sa himaya. Kun ang atong Ginoo nakasinati sa ingon kita usab sa tukmang panahon nga gimbut-an ang makasinati usab sa ingon.

 Kasinatian

Duha ka mga personahe ang nitungha sa maong hitabo. Sila si Moises ug si Elias nga sa ato pa ang maong hitabo katumanan sa balaod ingon man katumanan sa panagna sa mga propeta. Ang unod sa ilang gipanagsultihan mao man ang taliabot nga pag-antos ug kamatayon sa atong Ginoo.

Nagpasabot lamang nga ang kahimayaan mahimong makab-ot ug masinati kon moagi kita sa Domingo sa kasakit. Mas masabtan nato ang Domingo de Gloria kon moagi kita sa Dominggo sa Pasyon sa atong Ginoo.

 Lihok

Ning panahon sa kwaresma saka sa imong kaugalingong bukid aron mamalandong (Kahilom) Diha sa kahilom atong makita ug masinati ang Dios.

Nunot niini mas makita usab nato ang atong kaugalingon.

 Pangamuyo

Tanan: Ginoo nagkinahanglan kami og kausaban. Unta dili kami magbagulbol sa mga krus ug mga pag-antos nga among sagubangon. Kristo kaloy-I kami. Amen