Makabuang na diay ang vlogging

Tungod siguro sa sige og huna huna unsay ikontent, walay tulog nga manghubag na dili lang ang eyebag kon dili apil na ang utok, makahimo nalang og dili maayo ang uban aron lang ilang makontent. Wala sila masayod nga nabuang na diay sila paita.

Bitaw daghan kaayo ang paandar sa mga vlogger karon nga masobrahan na ug makahasol na sa uban. Sama nalang sa gihimo sa usa ka lalaking content creator sa lungsod sa Consolacion sa lalawigan sa Sugbo nga nagdahik-dahik sa tunga sa karsada nga nakasul-ob pa og costume sa snail ug iyang gisundog ang lihok niini nga gakamang nga nakamugna ug kahasol sa mga sakyanan.

Bisan og hamubo ra ang iyang gihimo apan nagbutang kini sa peligro dili lang sa iyang kinabuhi ug sa mga driver nga maamong sa iyang kabuang. Kay kong maligsan ra ba siya mogawas nga sad-an gihan ang driver nga makaligis niya, ug mao pay mabilanggo ug makabayad. Unsa man palabyon nalang kini?

Dili lang diay kini ang unang higayon nga nagpabadlong kining maong vlogger kay gi-banned na diay kini sa mga kan-anan sa lungsod sa Consolacion kay magsige og kontent nga makaamong sa ubang tawo. Ang iyang estilo sa vlogging gi-pattern niya sa gawas sa nasud nga mga dili kasarangan. Kong binuang man lang ang ilang content dili nalang niya iapil ang ubang mga tawo kon dili sila nalang mismo.

Sundogon nalang nila ang usa ka content creator nga kaniadto nikaon og bisan unsa bisan nabulit na sa bashing, ilabi na kadtong giingong nikaon siya sa hugaw sa hayop. Lood man gyud to apan wala man siya naghasol sa ubang mga tawo, nadato ra ba gyud kini.

Balikan nato ang nagpailang snail man. Nangayo na kini og pasaylo sa kapolisan sa ilang lungsod apan dili man sinsero kay giapil man usab niya sa iyang content. Tanang kahigayonan nga maghimo og content iyang gihimo basta mag viral lang. Hinuon nilampos siya kay nakaani siya og multimillion views ug taas kaayo ang performance pero pulos bashing ang iyang nadawat.

Mora’g nidaghan na ni sila karon kay kadtong grupo sa mga vlogger nga unang napatawag sa Highway Patrol Group kay nagkontent sa Transcentral Highway, misaad nga dili na mousab apan mibalik naman pud sa paghimo og peligro nga content dihang mitongtong siya sa atop sa sakyanan nga naa sa tunga sa karsada ug nagsayaw sayaw. Delikado kadto kay kong kalit modagan ang sakyanan ug siya madisgrasya, ang basolon ang driver na pud.

Sa tinuod lang ang content creation dako og matabang sa katawhan kay gihimo na kining panginabuhian tungod sa kita o earning gikan sa platform.

Apan worth it ba ang income kon kinabuhi na ang mabugti niini? Kini ang angayan tan-awon sa kagamhanan kon kon gikinahanglan nga mopatuman sila og regulation mahitungod sa mga digital creator aron malikayan ang mga dautang sangpotanan sa ilang pagpabadlong aron lang modaghan ang manan-aw sa kontent ug mo-follow sa ilang platform.

Kong ingon  niini nga mindset ang ipatigbabaw sa mga buang nga content creators dili nato ma imagine unsay mahitabo busa angayan patagmon ug sampolan pinaagi sa pagpasaka og kaso aron dili na mousab.