Tinuod ba ang charismatic gifts? Katapusang gula

Sa panahon nga nahitabo ang paglitok sa mga nagkadaiyang mga pinulongan sa panahon sa mga apostoles daghang mga tawo nga nakadungog niini ug nakasabot sanglit ang mga gipamulong pinulongan man gyud niadtong mga naminaw ug dili lang mga walay pulos ug dili hisabtang mga yamyam. Pag-abot sa Ikaduhang Siglo nahimong panagsa na lamang nahitabo ang maong panghitabo kun phenomenon.

Kini tungod ning mosunod:

a. Montanist Controversy. Nagtudlo kini nga ang pagsulti sa nagkalain laing pinulongan ang gikinahanglanon gyud sa usa ka matuod nga Simbahan ug sa mga Kristohanon. Kun wala kini mahupti sa tawo o mga matuohon sa ato pa, ang simbahan dili matuod. Dili paigo ang bunyag aron pagatawgon ang tawo nga Kristohanon. Kinahanglang anaa ang gasa sa glossolalia kun pagsulti sa lain laing mga pinulongan agig sukaranan nga sa tinud-anay gidawat gyud siya sa Dios. Kining maong panlantaw usa man ka heresiya.

b. Ang Pagsangyaw Kaniadto Gibatbat sa Pinulongang Griyego ug Latin Kaniadto. Kini ang malukpanong pinulongan kaniadto kun ang Universal Language sa ilang kapanahonan. Bisan gani ang pagsulat sa Balaang Kasulatan labina gyud sa Bag-ong Tugon sinulat man sa Griyego. Gihubad kini ngadto sa laing mga pinulongan sama sa Syriac ug Armenian. Gisangyaw ang mensahe ginamit ang mga pinulongan sa katawhan niadtong mga panahona. Tungod niini wala na kinahanglana ang dili kasarangang gasa sa paglitok sa mga nagkadaiyang mga pinulongan.

Aron magmapuslanon ang tawo nga nagasahan sa Gift of Tongue ang nagkinahanglag laing kauban nga mohubad niini aron hisabtan. Ang gasa mogamit sa laing gasa aron hisabtan sa katilingban. Apan kining maong pamaagi magdala usab og suliran. Ang pangutana mao unsaon pagtino kun pagseguro nga ang maong paghubad husto? Gikinahanglan ang mas lig-on nga sukaranan aron hisayran ang katinuod sa maong mga gasa. Kini mahitabo lamang diha ilawom sa landong sa pagtulon-an sa Simbahan.

Diha sa pangalagad alang sa kalingkawasan ug eksorsismo mao man nga ang nasudlan kun nayawaan ang makasulti og mga pinulongan nga wala siya’y igong katakus nga makakat-on niini. Kini nagpasabot nga dili kini gikan sa Espiritu Santo kondili gikan sa yawa. Gitawag kini og counterfeit charism of tongues.

Kun dunay mangangkon nga sila mosulti sa pinulongan sa mga anghel sa panahon nga sila mag speaking in tongues, angayan kitang magmatngon. Usa kini ka dakong tinonto. Ang mga angheles lunlon mga Espiritu ug dili mahitabo nga mosulti sila sa paagi nga mosulti ni makigkukabildo sibo sa atong paagi. Ingon nga mga espirituhanon linalang, wala nila kinahanglana ang bisan unsang instrumento sa pagpadangat sa ilang mensahe nga susama sa naandan sa mga tawo nga sama nato.