Kaluoy ni Davide

Sa lindog nato sa miaging Huwebes, gihisgotan nato ang kasagmuyo ni Cebu Vice Governor Junjun Davide kabahin sa gipanulti sa iyang kaatbang nga kuno si Junjun way nahimong kaayohan sa 2nd congressional district atol nga nilingkod kini kaniadto pagka gobernador.

Ang tinuod, pwerteng daghana nga mga proyekto nga nahimo ni Davide dihang siya ang nagdumala sa probinsiya isip gobernador gikan sa 2013 hangtud sa 2019. Tungod niini, gisuwatan ni Davide si Kongresista Galeos nga mao kuno ang nagsige’g ingon nga wa siya’y nahimo.

Gawas nga gisuwatan ni Davide si Galeos, gihatagan sab niini og kopya ang mga mayor sa second district, ug usa ka mayor nga gihulagway nga alyado sa kaatbang ni Davide maoy naghatag nako sa kopya sa suwat nga gipadalang Davide ngadto kang Kongresista Galeos.

Pero nakadayeg ko ni Davide kay bisan sa gihimo niini ngadto kaniya nga giingnang way nahimo nga kaayohan sa second district, gipatigbabaw niya ang pagka buotan, way mahait nga pulong nga gibuhian ngadto kang Galeos nga kaatbang niya sa pagdagan pagka kongresista.

Igo lang gipahinumdoman ni Davide si Galeos sa daghan niyang mga proyekto diha sa second district sa siya pa ang gobernador. Gawas sa second district, tibuok probinsya ang mga proyekto ni Davide.

Dihang mayor pa diay si Galeos sa Argao ug si Davide gobernador pa kaniadto, gihatagan diay gani og budget ni Davide ang Argao, P6 million para ipalit og yuta sa Barangay Bogo, nga katukoran sa bag-ong Isidro Kintanar Memorial Hospital.

Gipun-an pa gyud og laing P5 million para pag-develop sa maong yuta nga para matukoran sa ospital, ug naninguha pa gyud si Davide nga ang construction sa hospital magahinan sa Department of Health (DOH) og P70 million.

Sa duha ka termino ni Davide pagka gobernador, ang Kapitolyo nakahatag sa Argao og P108 million nga financial assistance para sa lainlaing proyekto, apil niini ang P5 million sa pagtukod sa public market sa Barangay Poblacion, Argao.

Kapin sa P200 milyones ang gipagahin ni Davide para sa pagpasemento sa mga karsada sa lainlaing dapit sa Argao. Dunay kompletong lista si Davide nga gibutang sa iyang suwat kang Galeos kon unsa nga mga karsada sa barangay diha sa Argao ug sa ubang mga lungsod sa second district nga nagastohan sa Kapitolyo dihang siya pa ang gobernador.

Bitaw, dili maayo nga limdan nato ang katawhan ug ingnon nga ang usa ka tawo way nahimo nga maayong serbisyo, apan ang mga tawo nga gisultihan niini, mangasuko na hinuon.

Aw, sama niining usa ka mayor nga giingong kaalyado sa kaatbang ni Davide apan maoy mihatag kanako sa kopya sa suwat nga gipadala ni Junjun ngadto kang Galeos.