Kataposang alas sa Pilipinas

Ang nasud nga pangulohan og usa ka haguka-huyang-bakakon ug walay baroganang kinatas-ang lider mahimo gyong alaot ug maoy labing makaluluoy.

Ug mao kini nahitabo sa Pilipinas: gikan sa middle class ngadto sa poorest of the poor, kinsa wala gyod makatilaw og malungtarong lami sa pamuyo ning administrasiyong naghitak ang kaabunda sa gidiling drugas ug daw maoy gihatagag prayoridad ang harapharapang korapsiyon. Diin, ultimong binilyong pundo sa PhilHealth, gihilabtan niining mga buayang mangangalagad, kinsa ingon sa wala nay kabusganan.

Ang makadismaya mao ang pagkaumol sa kuwestiyonableng 2025 national budget, diin sa bicam general appropriation budget report nga nahipos ni Kongresista Ungab, ilang nakita nga may mga pahina niini nga gigahinan og mga blangkong linya, unya sa gisumiter na ang pinaleng kopya ngadto ni Presidente Bongbong Marcos, nabutangan nag kompletong kantidad.

Hinungdan, may pipila ka abogado ang nadismaya, kinsa mipayil og kaso sa kinatas-ang hukmanan batok sa Kongreso ug hingtudang mga opisyal aron maimbestigahan-masubay diin magsugod ang kontrobersiya ug masilotan ang tanang nahilambigit.

Ang nakakuyaw, kay wala na matuman sa kasamtangang administrasiyon ang bahin sa balaod nga nagbahin sa tulo ka sangang may iyaiyang kinatas-ang gahom: ang Executive, Legislative ug Judiciary. Kay base sa atong himatikdan, ang Kongreso-Senado, DILG, ug Department of Justice morag nahiktan na sa liog tanan sa Executive branch. Diin, hasta si Vice-President Sara ‘Inday’ Z. Duterte nga kabahin sa Executve branch, gikontrahan nila tanan, na-impeach na sa Kongreso ug gusto pod nilang ipa-impeach sa Senado.

Maayo na lang, kay ang Korte Suprema, mipakitag ka patas sa pag-imbestiga sa kasong gipayil sa mga abogado. Sa duruha na ka gipahigayong oral arguments, bisag giunsa pagpaningkamot nga matakpan ang tinuod sa giimbitang resource persons, kinsa nagkabungabunga sa pagtubag sa mga pangutana sa huwes, walay bisan usa ang nakadulot. Hinunoa, gimandaran! Nga iuli-ibalik ang nakuhang kinatibuk-ang binilyong budget ngadto sa PhilHealth.

Ning panahon bisan walay gideklarar nga Martial Law, pero daw labaw pa sa gi-Martial Law ang mga kritikong mosaway sa mga hiwing binuhatan sa administrasiyong Marcos, usa na lang gyod ka alas ang nahabilin sa Pilipinas – ang Supreme Court.

Unta, sila na ang gipadalang langitnong tubag sa pag-ampo-gipangayo sa katawhan: “God, save the Philippines!”