Davide nasagmuyo

Naluoy tawon ko ni Cebu Vice Governor Junjun Davide kay duna kuno’y gipalakaw nga estorya gikan sa iyang kaatbang sa politika nga siya way nahimo nga kaayohan para sa katawhan sa second congressional district sa Sugbo.

Gisuwat ko kini kay nasayod ko nga pagka gobernador ni Davide kaniadto, pwerteng daghana sa nahimo niyang mga proyekto diha sa second district, ug sa ubang mga dapit sa probinsiya, ug sakit kaayo para kang Davide nga ingnon nga wa siya'y nahimo atol sa iyang katungdanan.

Gani, ako maoy nag-edit kaniadto sa balita sa among reporter sa Banat News nga nagsuwat sa news kabahin sa daghang proyekto ni Davide nga naglangkob sa mga farm-to-market roads, pagpatukod og mga public markets, health programs ug daghan pa.

Kaniadto, kon mobisita ko sa among barangay sa Lambusan, San Remigio, moderitso gyud ko sa Bogo City, unya motuyok pa sa San Remigio usa pa mahiabot sa among barangay.

Apan tungod sa sementadong karsada nga gipahimo ni Davide nga milagbas sa kabukiran gikan sa Anonang Norte, Bogo City paingon sa Lambusan, San Remigio, pwerteng dalia na nako nga mahiabot sa among dapit kon mouli ko sa probinsya.

Ingon usab niini ang gihimo ni Davide sa ubang mga distrito sa tibuok probinsya sa walay pagpinig kon kinsa ang mga mayor sa mga lungsod, mahimong dili iyang kaalyado, apan patas ang iyang panerbisyo.

Si Davide karon, wa na magpasubli sa pagka bise gobernador bisan og giagni siya ni Governor Gwen Garcia nga maoy iya unta nga ka-tandem, tungod kay gusto niyang motutok pagserbisyo sa iyang distrito, ang second district.

Ang second district naglangkob sa mga lungsod sa Argao, Dalaguete, Alcoy, Boljoon, Oslob, Santander ug Samboan. Ang incumbent nga kongresista karon mao si Edsel A. Galeos.

Matud pa nga sa pito ka lungsod, ang mayor ra sa Argao maoy kaalyado ni Davide, apan nasuta nako nga duna pa diay mga mayor tingali nga hilom nga misuporta kang Davide kay nalooy kaniya.

Ang usa ka mayor nga giingong tua midapig ni Galeos mipadala nako sa kopya sa suwat ni Davide ngadto kang Galeos kay gipadad-an man sila og kopya ang mga mayor. Sa suwat ni Davide, kang Galeos nasagmuyo tawon ang bise gobernador.

Dunay nakasulti ni Davide nga sa mga diskurso ni Galeos sa mga tigum sa lainlaing dapit, moingon kini nga ang iyang kaatbang way nahimo sa katawhan sa second district.

Matud ni Davide nga dili tawon tinuod nga wa siya’y nahimo sa katawhan sa second district atol sa iyang pagka gobernador. Gani sa suwat ni Davide, gibatbat niya ang minilyon ka pesos nga kantidad sa mga proyekto nga gipundohan sa Kapitolyo para sa second district.

Sumpayan nato ni karong Sabado.