Comelec delikadog masuwitik?

Sobra ra ka sensitibo ang atong mga lider sa nasud karon sama sa Comelec, ilabi na sa mga anaa sa Kongreso (hinuon dili tanan). Kay sa higayon nga makadungog lang og pagsaway, komentariyo, pangagpas-pangutana o negatibong opiniyon base sa unsay ilang binuhatan nga dili na maayo, gikan sa katawhang nagpakabana, kinsa mao ang matuod nilang amo, ila dayong imbitahan ug pakuninitag paak sa mga nahigtan na sa liog nga mga iro, kinsa wala na makaila-tahod sa freedom of press, of speech and of expression.

Usa ka Atty. Jeryll Harold Respicio, certified public accountant ug abogadong hait, may kaugalingong law firm, kanhi IT consultant, Information Center Security expert ug milansad pagka bise mayor sa Isabela niining 2025 midterm election, adunay giyagyag nga importante kaayong inpormasiyon pinaagi sa iyang Facebook account, ang bahin sa mga vote-counting machine nga maoy gamiton gikan sa pagboto, iniphanay ug hangtod na sa resulta, diin may posibilidad kuno nga kini madaya-tikas.

Gihangyo ni Atty. Jeryll ang taga Comelec sa ilang probinsiya aron ilang lingkoran ug iyang mapakita sa aktuwal gamit ang Comelec vote counting machines kon nganong may posibilidad nga matikas ang iniphanay ug resulta, apan wala siya paminawa.

Usa ray tumong sa abogado – nga makaangkon tanan og usa ka honest election. Apan, gibalibaran siya ug gikasuk-an pa! Ngano kaha?  

Sa usa ka Teleradyo Serbisyo interview, aduna siyay gisugyot sa Comelec: “Huwag mong i-connect yong makina sa internet bago ka mag-print ng election return.

At saka mo lang dapat siya i-connect sa internet pagkatapos mo nang i-print ang election return.” Kay niini lang paagiha nga maangkon ang honest election ug makatabang paglimpiyo sa imahe sa Comelec nga hagbay rang nabun-og sa mga pagduda.

Apan naunsa ba, nga gipaylan man hinuon si Atty. Jeryll sa Comelec og kasong cyberlibel, disqualification ug pahuboan sa iyang propesiyon? Hinuon, wala mahadlok ang isog-palaban nga abogado. Maong nagkatawa lang namulong: ‘andam siya sa pag-atubang niining tanan.’

Pastilan, ning gihimo sa Comelec, dili kaha mosamot pagdaghan ang magduda nga delikadog ang resulta sa ilang boto masuwitik?

Gani, may mga oposisiyong gusto nga himoong manual voting-counting na lang ang eleksiyon. Mosugot kaha ang administrasiyong Marcos?

Hahayyy, kaluoy gyod natong mga Pinoy!