EDITORYAL — E-vehicles, renewable energy mao ray paagi

Nagkadaghan na ang mga electric vehicles dinhi sa Sugbu nga nagdagan sa kadalanan. Kun kaniadto mga electric bikes ug electric tricycles lang ang nagdagan karon naa nay mga nindot nga mga awto nga service sa mga maka-afford pagpalit ani.

Kaning mga electric vehicles dako og matabang sa tinguha sa mga gobiyerno sa kalibutan nga mamenusan kining ilang mga carbon footprints o kanang carbon emissions gikan sa mga makinarya nga gipadagan pinaagi sa fossil fuels o petrolyo. Ang petrolyo dunay aso nga mogawas human sa ignition niini sa sud sa mga makina ug mao kini ang hinungdan sa polusyon.

Sa pagtuon sa siyensiya, giingon nga ang carbon dioxide o aso , maayo sa mga tanom kay apil kini sa gikinahanglan niini aron molabong ug mamunga.

Ang mga kahoy o mga tanom nagsilbing salaam, kay ang ibuga sa mga tanom oxygen man nga maoy gikinahanglan sa tawo ug mga mananap sa ilang pagginhawa aron mabuhi.

Apan unsaon man ni karon nga hasta ang mga kalasangan nga mosala sa polusyon ug mohatag og limpyo nga hangin para sa tanan, gipamutol naman?

Ang resulta mao kining gitawag karon nga pag-usab sa dagan sa klima o Climate Change  nga nakapakurat sa tanan kay nakalitan.

Kaning mga electric vehicles kuwang pa kini aron hingpit nga mahunong ang pagbilin og carbon footprints, kay naa pay daghang makinarya, dili lang mga sakyanan o makina sa transportasyon ang gagamit og petrolyo karon.

Apan dili modaghan ang mogamit aning e-vehicles kun gamay ra kaayo ang mga charging stations nga makargahan sa mga baterya.

Dili makapaabot og aksyon ang gobiyerno gikan sa mga oil companies nga magbutang og charging stations sa ilang mga gasolinahan kay mao kini ang mopatay sa ilang negosyo.

Kinahanglan nga ang gobiyerno moagni og mga negosyante nga mamuhonan aning charging stations. Tabangan sila pinaagi sa paghatag og mga insentibo sama sa aron sila ganahan pagbubo og puhonan ani nga negosyo.

Sa samang paagi, kinahanglang pangusgan sab ang pagdiskubre ug pagtukod og mga renewable energy sources, sama sa solar, wind, wave, current, hydropower, geothermal power ug uban pa nga mo-produce og enerhiya aron makasuporta sa mga e-vehicles.