Sa paagi nga gisud-ong nato ang uban

Maayong Balita

Pebrero 23, 2025: Ika-Pito nga Domingo sulod sa tuig

Mga Pagbasa: 1 Sam. 26;2,7-9,12-13,22-23/Sal. 103/1 Cor. 15;45-49/Lk. 6;27-38

Ang atong  Ginoo sa Ebanghelyo nato karong Domingoha nga ang paagi sa paghukom sa uban mao man sab ang paagi nga kita pagahukman.

Nga sa ato pa, ang paghimo og maayo lakip na niini ang pagpasaylo ang wala lamang magasukad sa paghimo og maayo ni paghigugma kanila nga suod lamang sa atong kasingkasing kondili hasta usab sila nga giisip natong mga kaaway.

Malisod man tuod kini pagahimoon apan walay imposible kun anaa ang grasya sa Dios.

Kasinatian

Mahukmanon kaayo ang mga tawo karong panahona. Gani diha sa social media atong Mabasa ug madungog ang mga komentaryo nila nga mga self righteous ra kaayo. Sila kadtong mga tawo nga nahikalimot nga kita mga tawo ug dili mga anghel. Sa paagi nga gisud-ong nato ang uban mao man usab ang mosalamin sa atong mga kaugalingon. Kun wala kitay pagsalig sa atong kaugalingon, wala usab kitay pagsalig ngadto sa uban. Usahay kita dili kontento hangtud dili kita makabalos. Nagtuo man gud kita nga ang atong nasinati nga mga kasakitan kinahanglan nga madoble kanila nga nagpahamtang niini kanato. Mao nga padayon sa gihapon ang liyok sa kapintas bisan gani hangtud karon.

Lihok

Sa dili ka pa mohimo sa imong panimalos kanila nga nagpaksakit kanimo hunahunaa daan kun makahatag ba kini kanimo og tinud-anay nga kalinaw.

Pangamuyo

Ginoo masalaypon kami. Nangamuyo kami nga kun mahimo imo kaming hatagan sa grasya nga mamalandong sa dili pa kami mohukom sa uban. Ikaw nga buhi og hari hangtud sa kahangturan. AMEN.