Unsa man ang grasya?

Usa kini ka gasa nga gikan sa Dios (supernatural gift) nga gihatag sa Dios ngari kanato pinaagi sa merit oni Kristo alang sa atong kaluwasan. Dunay duha ka matang sa grasya.

1.  Aktwal nga Grasya

2.  Grasya nga Makasantos

1.  Kay unsa man ang aktwal nga grasya

Kini mao ang matang sa grasya nga hinabang gikan sa Dios. Lamdagan niini ang atong hunahuna ingon man ang atong kabubut-on diha sa paglikay sa dautan ug paghimo og maayo.

Ang maong grasya motabang kanato diha sa paglikay sa pagpakasala.

Hinabang kini sa Dios alang kanato mahimong diha sa sinugdanan sa pagkakabig sa tawo o diha sa lihok paningkamot alang sa pagkabalaan o pagkasantos. (CCC 2000).

2.  Kay unsa man ang grasya nga makasantos?

Kining maong grasya nibalaan ug nihimo sa kalag nga makapahimuot ngadto sa Dios.

Matud pa CCC 2000: “ Ang grasya nga makasantos kun makapabalaan usa man ka naandang gasa, usa ka disposisyon nga supernatural diin gihingpit niini ang kalag aron magpakabuhi uban ang Dios, molihok diha sa iyang gugma. Kining maong naandang grasya (Habitual Grace) makatabang aron ang kalag magpuyo, molihok segun sa diosnong tawag.

Mahanaw kini kun kita makasala sa salang mortal. Matang sa sala diin kita dunay kahibalo ug dayag nga tumong sa paghimo sa ingon.

Hinuon gumikan sa marka kun timaan nga atong nadawat panahon sa atong bunyag, ang maong grasya nga makasantos mauli pinaagi sa kinasingkasing nga paghinulsol ug pinaagi sa Sakramento sa Pakighiuli.

Sanglit anaa man ang grasya nga makasantos sa atong kalag, nahimo kitang mga anak nga sinagop. Ingon nga mga anak nga sinagop ang tanan natong pagahimoon tungod sa atong gugma sa Dios ug sa atong isig ka ingon, ang maong mga buhat adunay merito.

Apan sa mga higayon nga kita makasala ang maong mga merito mahanaw.

Ato silang mahuptan pag-usab kun mabalik ang grasya nga makasantos.