Suka gibubo sa pekeng bulawan

Hagbay rang naguba ang reputasiyon ni Presidente Bongbong Marcos Jr. (PBBM). Paglingkod pa lang niya sa Malakanyang, nagay-ot na! Human si kanhi Executive Secretary Atty. Vic Rodriguez, iyang suod sinaligan panahon sa mga kampanya, kinsa naningkamot nga matuman ang unsay ilang gisaad sa katawhan – ang pagpadayon sa nasugdan nang good governance ni kanhi Presidente Rodrigo Roa Duterte, imbes iyang paminawon-protektahan, gipasagdan lamang niyang matangtang sa puwesto tungod sa mga tinumotumong pasangil. Si Atty. Vic mitug-an, nga isip executive secretary, dili siya gustong mamaot si PBBM. Hinungdan, kutob sa politikong miaplay pagka-cabinet member, iyang gipangsubay ang mga rekord. Ang may mga tunob sa korapsiyon-kahiwian, iyang gipadaplin samtang kadtong adunay limpiyong agi maoy iyang irekomendar-sumiter ngadto ni PBBM aron maoy ipang-appoint.

Pero may impluwensiyadong hawod sulod sa Malakanyang, duol sa kasingkasing ni PBBM, kinsa nanghilabot sa kaakohan ni Atty. Vic, mihatag og kaugalingong listahan sa mga dagkong pangalan nga markado-nailado na sa mga salawayong buhat apan maoy gustong ipa-appoint isip cabinet members ni PBBM sa maong hawod. Diin, gamit ang kagamhanan niini, natangtang gyod si Atty. Vic. sa pagka-executive secretary. Resulta? Mibaha ang walay hunong korapsiyon sa Pilipinas.

Sa unang adlaw sa Aliyansa para sa Bagong Pilipinas proclamation rally, gisayonsayon ra ni PBBM pagtawag ang tanang kandidato sa PDP Laban og ‘suka’ kay wala ra kuno sa kumingking ang kalidad-kapasidad nga nahuptan kon ikomparar sa iyang mga senatorial candidates. Pastilan, ang pagkamapahitas-on na lang niyang manulti. Nalimot, nga kon ang suka ibubo sa pekeng bulawan, molubad gyod kini sama sa paglubad sa iyang panghunahuna ug hinulamang kinaiya panahon sa kampanya sa 2022 election, diin siya nagpatuong nagilakgilak nga genuine gold, pero peke diay.

Ning paghingalan ni PBBM og suka sa PDP Laban senatorial slates, kinsa kadaghanan mga abogado, positibo nila kining gidawat. Si Atty. Vic namahayag: “Kaya ako ay natutuwa kung ito man ang Team Suka, isa po akong proud member ng Team Suka. At atin pong lalalabanan ang Team Sinusuka!”

Walay kalainan ang pamahayag ni Atty. Vic sa sukang iyang gibubo sa pekeng bulawan. Misamot pagdaghan ang milyonmilyong dumadapig nga nakadayeg sa iyang kahait. Diin tikas ra gyoy makapilde niya sa midterm election.