Happy Valentine’s all lovers

Ang kakabos nga dulot sa numero unong korap nga pagpamunoan, dili makapugong sa managhinigugmaay, kinsa manggawas g'yud sa balay ug moadto sa  halandumong dapit aron pagsaulog sa ilang iyaiyang love story niining adlawa, Pebrero 14, 2025, diin ang pagka-santos unta ni Santo Valentino, kinsa walay kukahadlok nga mamatay tungod sa  paghigugma sa iyang isig ka tawo, maoy angay untang sundon nga matang sa gugma.

Daghang gugmang tikasan. Hit and run. Human makaiskor sa Valentine’s Day, may mga Dodong nga sa higayong mabuntis si Inday, lihaylihayan dayon ang obligasiyon. Usab, may pipila nga daw mihimo nang ulipon ni Inday human nila kini makuha. Ug sayonsayonon na lang ang pagduladula niini. Diin, sa higayong mobalibad, buwagan gilayon. Hinungdan, nga ning administrasiyong daw gi-promote ang paggamit sa illegal drugs, mao na lamay atong mabalitaan nga may mga Indayng naghikog.

Hinuon, may gugmang matinud-anon-masinaboton. Bisan wala ihatag ni Inday ang gipangayo ni Dodong ning Adlaw sa mga Maghigugmaay, imbes biyaan si Inday, misamot hinuon paglipang ang gugma ni Dodong. Ilabi na dihang ang dalaga mipasumbingay:

“Kon gusto kang mokaon og bunga, agi usa sa punoan.” Nga tin-aw kaayong unsay gustong ipasabot ni Inday? Nga kinahanglang atubangan sa mga ginikanan sa babaye, mananghid ang lalaki nga gusto na niyang angkonon si Inday ug pakaslan. Sa laktod, marriage first before sex! Matang sa kasagrado sa

 gugmang maoy gustong ipatuman sa atong Ginoo, nga hagbay rang gisupak sa kinabag-an.

Pagkaanindot unta, kon kadtong managhigugmaay'ng giuran-uran na lang ang pre-marital sex, ang pagbisita sa simbahan maoy una nilang agenda sa pagsaulog ning Valentine’s Day uban ang saad nga magpakasal na ug likayan ang pagpakighilawas samtang wala pa mahiusa sa kaminyoon. Apan kaya kaha? Anaa ra gyod sa tagsatagsa ka kaugalingon ang paghukom. Basta, ang pre-marital sex makaimpiyerno samtang ang paglikay niini, makapahalangit.  So choose the best before it’s too late!

Busa niadtong managhigugmaay, kinsa likayan na ang pre-marital sex ug kontento nang motan-aw sa pasundayag sa Sweetnotes, gikuninitang sikat kaayong couple’s romantic band, nga mopasundayag karong adlawa diha sa Cebu City Sports Complex, agig pagsaulog sa inyong gugma, Happy Valentine’s Day, all lovers!

At least, inyong nalikayan ang pagpakasala niining adlawa.