Wa malimot

Dugay na nga giyatakan sa China ang katungod sa Pilipinas sa kaugalingon niining teritoryo.

Misamot ang pagpalabi-labi sa China atol sa administrasyon ni kanhi Presidente Rodrigo Duterte tungod sa pro-China niya nga foreign policy.

Nanguhong ang POGO nga matud sa mga awtoridad konektado sa daghang illegal nga kalihokan sama sa drugas, smuggling ug human trafficking.

Gipahimuslan sa China ang pagpamahigalaon sa administrasyong Duterte pagtukod og mga artipisyal nga isla sulod sa atong teritoryo nga karon tataw nga gihimo na nilang military base.

Dihang misulod ang administrasyon ni Presidente Ferdinand Marcos Jr. ug mi-pivot pagbalik ang polisiya niini ngadto sa Amerika, gihasi og maayo sa China ang atong mga mangingisda ug Coast Guard.

Sud sa makadaghang higayon giatake sa Chinese Coast ang atong mga barko pinaagi sa pagpasirit og tubig, laser, ug pagdasmag nila.

Sa makadaghang higayon gibarugan sa PCG ang atong teretoryo bisan way dag-anan sa mga higanteng barko sa China.

Sanglit ang Amerika atong kaalyado, ug isip kabahin sa responsibilidad niini pagmintinar sa kahapsay ug kalinaw sa rehiyon, gipakatap sa Amerika ang missile system niini dinhi sa atong teritoryo.

Butang nga nakapasuko sa China ug miawhag sa Pilipinas nga iuli ang maong mga armas aron paglikay sa posibling pagkuyanap pa sa tensiyon tali sa duha ka nasud.

 Apan saludo ko sa kalig-on nga gipakita ni Presidente Marcos taliwa sa bahad sa China.

Atol sa iyang pagbisita dinhi sa Sugbo niadtong Huwebes, gipadayag ni Marcos nga iuli lang niya sa Amerika ang missile system kun hunongon sa China ang pagpanghasi niini sa Pilipinas.

Kini maoy baruganan sa usa ka lider. Ug salamat nga wala kalimot ang presidente sa iyang saad atol sa kampanya nga way bisan usa ka dangaw sa atong teritoryo ang iyang isurender ngadto sa China.