Wala kasukol sa kakatol
Nahibawo tang tanan nga pamolitika ang tuyo sa mga imbestigasyon sa House of Representatives batok sa mga Duterte. Ang House Quad Committee nagsusi sa papel ni kanhi Presidente Rodrigo Duterte sa extrajudicial killings, Philippine Offshore Gaming Operators ug ilegal nga drugas. Samtang ang House Committee on Good Government nagsusi giunsa pagasto ni Bise Presidente Sara Duterte ang iyang confidential funds.
Pero nakatsamba ang mga imbestigador paghipos og lig-ong mga ebidensiya sa mga krimen nga gipasangil batok sa amahan ug anak. Maong napalambo nila ang paglaom nga masilotan ang mga Duterte.
* * *
Ang popularidad sa mga imbestigasyon–minilyon ang nag-atang sa public hearings bisan nilungtad tibuok adlaw ug gabii–nanukad sa talagsaong pagtakdo sa pamolitika sa administrasyon ug sa interes sa mga biktima sa mga Duterte, nga andam na untang magpakahilom, pagkab-ot og hustisya.
Ang kahinam sa publiko sa mga imbestigasyon giubanan sab sa paglaom nga ang mga kongresista, bisan kasagaran nila mga sakop sa politikanhong mga dinastiya, mapugwat sa nagbuntaog nga kriminalidad ug pangurakot nga ilang gi-imbestigar ug madasig sa pagtarung sa ilang trabaho ug sa pagmenos sa ilang naandan nga pangawkaw.
* * *
Pero nakalimot ta sa tinuod nilang bayhon. Dili diay sila makasukol sa tentasyon. Mora silang mga sakop sa akyat bahay gang nga gibutangan nang daan og hagdanan pagkatkat sa koral, giablihan nang daan ang mga pultahan ug bintana sa gibiyaan nga palasyo ug gilinya nang daan ang kawatunon nga kuwarta, alahas ug mahalong kabtangan.
Nakalimot nga wala pa mahuman ang ilang trabaho. Nga buhi pang mga Duterte ug andam nga mopahimulos sa ilang mga bulilyaso.
* * *
Ug nanghatag og dagkong bato nga ipukpok sa ilang ulo: Pagbahin-bahin sa Ayuda sa Kapos ang Kita Program o AKAP (P21 bilyones sa mga kongresista ug P5 bilyones sa mga senador); pagwagtang sa P74 bilyones nga subsidy sa Philippine Health Insurance Corporation; paglaslas og P42 bilyones sa budget sa edukasyon; ug paghimong P1.1 trilyones sa budget sa Department of Public Works and Highways (kansang mga proyekto kapatongan og dagkong komisyon).
Wala ba lang kaagwanta sa kakatol sa pagpangawat? O igo lang naningil og premyo sa pagtuman sa sugo sa Malakanyang sa pakigbugno sa mga Duterte nga kanhi nila gisipsipan?
* * *
- Latest
