Klaro ra alang kang Juan
Pagpamalandong sa Malangkubong kaayohan
Disyembre 15, 2024:
Ikaduhang Domingo sa Adbiyento
Mga Pagbasa: Sof. 3;14-18/
Is. 12/Fil. 4;4-7/Lk. 3;10-18
Maayong Balita
Si Juan Magbubunyag wala magpakaaron ingnon kun kinsa siya. Wala siya nangangkon nga siya mao ang Mesiyas. Wala siya nagpasiatab sa iyang pagkatawo bisan pa man kun sa iyang pamaagi nakadani siya og mga sumusunod. Hugtanon siyang niangkon nga dili siya ang Mesiyas hinunoa, usa lamang siya ka precursor kun tig-una. Kay lagi dili man siya takus nga mohubad bisan gani sa iyang mga sandalyas.
Kasinatian
Karong Domingoha gitawag og Gaudete Sunday. Ang Dominggo sa Pagmaya. Kini tungod kay hapit na gyud moabot ang Ginoo. Angayan lamang nga ato siyang sugaton uban ang dakong pagmaya ug kalipay ang taliabot nga Ginoo nga nagpakatawo. Luyo ning maong kagahob mas makaayo nga sama ni Juan nga nihawan sa agianan sa Manunubos ato pud untang hawanan ang atong tagsa tagsa ka mga kasingkasing. Aron kalipay nga gitinguha mamahimong hingpit!
Lihok
Aron mamahimong mas konkreto ang atong pagsaulog ang Pagmaya ning Pasko sa Pagkatawo pinaagi sa pagsabot sa pulong JOY ingon nga:
J kun Jesus si Jesus maoy atong unang hinungdan sa pagmaya. Nagmadaugon siya diha sa pagbuntog sa kamatayon. nagmadaugon siya batok sa gahom sa kangitngit. Isip mga Kristohanon niambit kita ning maong kadaugan.
O kun Others. Ang pag-alagad sa uban makapabulahan man kanato. Dili tanang tawo ang nahatagan og kahigayonan sa pag-alagad sa uban. Pasko panahon sa pag-inalagaray. Angayan nato kining saulogon.
Y kun You. Ikaw, kamo! Kita! Kun wala ang matag usa dili mamahimong hingpit ang pagsaulog. Magmaya kita niini ug unta ang atong nawong mosalamin unta sa kalipay nga atong nadawat.
Pangamuyo
Ginoo, himoang motuhop sa among tagsa tagsa ka mga kasingkasing ang tinguha nga mamahimong magmalipayon kay anaa ka uban kanamo. Ikaw lamang ang makatagbaw sa among kalaay ug kaguol. Bisan tuod dili kami takus apan tugoti nga mahimo kaming angayan sa pagsunod sa imong mga tunob. Amen.
- Latest
