Panaw sa Adbiyento: Si kinsa ang angay nga mahimuot

Sukaranang Teksto :Mt. 11;16-19

Dili tiaw ang gibati nga kasagmuyo sa atong Ginoo sa mga tawo  nga iyang gikahibalag. Human sila makapaminaw kaniya daghanan gihapon ang wala motuo kaniya.

Tinuod gyud diay ang panultihon nga: You Cannot Please Everybody. Si Juan Magbubunyag nianhi ug nagpuyo sa kinabuhi nga puno sa pagsakripisyo giaksuhan siyang nayawaan.

Ang atong Ginoo nakighugoy hugoy ug nakigsalo sa katawhan ang giisip man nga ulit, palahubog ug higala sa mga makasasala. Kun kini nahitabo sa atong Ginoo ug kang Juan Magbubunyag mahimo usab kini nga mahitabo kanato.

Ning taliabot nga pagkatawo sa atong Ginoo angayan kitang makaamgo nga ang rejection ug accusation mahimong mahitabo.

Apan sa laing bahin imbis masagmuyo angayan kitang mobarog ug magmatinud-anon sa atong baruganan ug panlantaw.

Kay ang pagbuhat sa ingon usa man ka paagi aron mamahimo kitang gawasnon. Kun dili nato mapahimuot ang kadaghanan mas makaayo alang kanato nga ang Dios maoy malipay sa tanan natong pagabuhaton ug dili ang tawo.

Sa atong panaw padulong sa adlaw’ng natawhan sa atong Ginoo atong ablihan ang atong hunahuna aron tugkaron ug sabton ang mensahe sa Dios diha sa lamdag sa simbahan.

Ablihan nato ang atong mga kasingkasing aron makahugas nga mensahe sa paghinulsol ni Juan ang molinis niini aron mamahimong tagana ug abli usab kini alang sa uban.

Labaw sa tanan ang atong mga dalunggan ingon man ang atong mga mata makatutok lamang sa Dios ug wa nay lain pa. Kay after all ang Pasko si Jesu-Kristo man ang sentro ug dili ang Christmas Tree.