Mora'g tambal, mora'g mayo

Nakakompiska ang kagamhanan og balor P28 milyones nga kantidad sa peke nga tambal ug uban pa’ng mga health product ubos sa kampanya nga Oplan Katharos nga gipangulohan sa Food and Drug Administration (FDA).  Angayan nga lutoson ug silotan kining mga tigbuhat og mga peke nga tambal kay naghatag kini’g kakuyaw sa panglawas sa katawhan. Lisod kon magpatuyang sila sa ilang dili maayong binuhatan kay “magpunay lang unya kita’g tumar og “mora’g tambal”, diin, “mora’g maayo” ra pud unya kita sa atong balatian.”  Madahaan!

Nag-ilog sa bukog

Giawhag ni House Speaker Ferdinand Martin Romualdez kadto’ng mga senador nga supak sa Ayuda sa Kapos ang Kita Program (AKAP) nga makighinabi sila sa katawhan aron masabtan gayod nila ang kamahinungdanon sa maong programa. Mokabat P39 bilyones nga budget alang sa AKAP sa tuig 2025 nga buot wagtangon sa Senado tungod kay, sukwahi sa katuyoan, wala man kini mapunta sa labing kabos nga sakop sa katilingban.  Nanimaho’g “kagwang” ang rason ni’ng panagbangi sa kongreso ug senado kabahin sa AKAP.  Matud pa sa akong higala, “Nahisama ni’ng kahimtanga ang Kongreso ug ang Senado sa duha ka iro nga nag-ilogay sa bukog.”  Muleeng!

Kontrolahon ang pagdagayday

Namahayag si Senador Joel Villanueva nga bisan sa mga pagsaway nga nadawat sa DPWH tungod sa kapakyas niini pag-implementar sa intergrated flood control master plan, makadawat gihapon ang ahensiya og mokabat P 1 bilyones nga pundo matag adlaw alang sa mga programa sa flood control sa maong buhatan.  Sa kadako sa gigahin nga budget wala na untay rason ngano nga makasinati gihapon ang katawhan og kalisod gumikan sa baha.  Apan segun sa obserbasyon sa kadaghanan, “Dili baha ang makontrolar niining gidak-on sa kwarta kon dili ang pagdagayday sa maong bahandi ngadto sa bulsa sa hingtungdan.”  Fezteleern!

Maglana’g Potot

Segun kang Kongresman Robert Ace Barbers, gawas nga gipabahaan ang atong kamerkadohan og mga peke nga produkto, mipakatap na usab karon ang China og mga peke nga fishing boats nga gisakyan sa mga Chinese coast guard ug naval personnel. Gibuhat kini sa China aron padayon nga maestablisar ang ilang presensya sa West Philippine Sea.  Sa tinarong man o sa tinonto’ng paagi, lupig gayod ang Pilipinas sa mga deceptive tactics sa China.  Mao kana’y giingon nga, “Kon kabahin na gani sa pag-alkontra sa China sa ilang mga stratehiya diha sa WPS, may’pa’g maglana’g potot ang Philippine Coast Guard.”  Pagkatoytoy!

Adto palit sa DA/DTI

Matud pa ni Agriculture Secretary Francisco Tiu Laurel, Jr., dili na kinahanglan nga butangan og price cap ang karne’ng baboy, labi na ang lechon, karon’g umaabot nga holiday season ug nga adunay igong suplay sa karne’ng baboy hangtud sa katapusan sa tuig.  Husto ang kalihim, dili tungod sa rason nga iyang gibutyag, kon dili tungod kay dili man gihapon motuman ang mga meat retailer ug lechon vendors sa price cap.  Kay kon mo-insister ang mamalitay sa presyo nga gilatid sa DA/DTI, moingon man usab ang mamaligyaay nga, “Adto mo palit sa DA/DTI.”  Atala lagee!