EDITORYAL - Ampingan ang mga bata

Ang atong kabataan maoy, matud pa sa nasudnong bayani nga si Dr. Jose Rizal, paglaum sa nasud. Mao nga importante gyud kaayo silang ampingan.

Apan subo kaayo niadtong adlaw nga Martes nga duha ka batang nag-edad og 9-anyos ug 10-anyos ang naaksidente samtang sila padung mosulod sa ilang eskuylahan aron motungha.

Ang 9-anyos nga batang naaksidente, nahitabo kini diha sa Barangay Babag sa dakbayan sa Lapu-Lapu. Matud pa sa report, nadasmagan kini og motorsiklo samtang ang bata nilabang sa dalan padung unta sa iyang eskuylahan.

Nakabsan gyud siya sa kinabuhi. Subo kaayong naputol atong tungora ang iyang mga pangandoy ug sa iyang mga ginikanan.

Kana untang mga motorista mag-amping gyud unta sa ilang pagpadagan sa mga oras nga tigpanulod o tigpanggawas sa mga estudyante. Kay dili gyud malikayan nga dunay maglabang-labang sa karsada.

Dili kwestyon kun asa sila nilabang, ang angay hinumdoman nga oras kana sa tigpanggawas o tigpanulod sa mga estudyante ug mas maayong managana nalang daan kay basin dunay mokalit og labang.

Sa pikas bahin, kinahanglan gyud unta nga tudloan ang mga bata bahin sa luwas nga paglabang sa karsada.  Duna gyud untay klarong mga safety traffic signages o warning signages duol sa mga eskuylahan.

Samtang bantayan gyud pirme ang mga karsada nga duol sa mga eskuylahan dungan sa pagsige og pagpahinumdom sa tanan para sa ilang kaluwasan.

Sa pikas bahin, usa sab ka 10-anyos nga tinun-an sa Barangay Apas, Cebu City ang naaksidente human natusok kini og kabilya diha sa iyang mata.

Ang bata matud pa padung sab sa eskuylahan agi sa “shortcut” apan nadisgrasya kay natusok ang mata niini og kabilya nga gihimong tukod sa nagyungyong nga wire sa kuryente.

Dili gyud matagna ang panahon, busa ampingan gyud unta sa tanang oras ang mga bata ilabi na kun sila mogawas sa ilang panimalay.