Paabot lang mag-combulsion

Segun sa assessment nga gihimo sa non-profit research group nga Access to Nutrition Initiative (ATNI), ang mga dagkong food and beverage companies sa kalibutan sagad nagbaligya ngadto sa mga low-income nga mga nasud og mga produkto nga dili masustansya kon itandi sa ilang gibaligya sa mga adunahan nga nasud.  Alang sa mga kabus, swerte na kon makapalit og makainom og Pepsi o Milo busa dili na igsapayan kon sakto ba kini sa gitakda nga nutrisyon.  Matud pa bitaw, “Karon ang mga bata, sayon-sayonon ra ang pag-order og milk tea.  Kami intawon sa una, maka-inom lang og sopdrink kon mag-combulsion na.”  Atala lagee!

Modaug ang negosyo

Gisaway ni Senador Cynthia Villar ang condominium-style nga housing project sa Department of Human Settlement and Urban Development (DHSUD) kay mga middle class lamang kuno ug dili ang mga kabus nga banay ang maka-benepisyo sa maong proyekto.  Sa usa ka binuhat nga nadato gumikan sa paghimo og mga subdivision projects, dili nato maingon nga tim-os ug lunsay ang katuyoan sa pagsaway ni Senador Villar.  Ni’ng kahimtanga, haum ang panahom nga, “Kon magbangi gani ang pamatasan ug ang negosyo, kanunay’ng magmadaugon ang negosyo.”  Muleeng!

Walay signal

Gikataho nga makabaton na og kaugalingon’g fire station karong sunod tuig ang lungsod sa Maripipi sa probinsya sa Biliran.  Angayan tingale nga himoon nga usa sa mga rekisitos ang fire station sa dili pa hingpit nga ideklarar ang lugar nga usa na ka lungsod.  Makapahinumdum sa mayor nga sulagma’ng mibisita sa hilit nga barangay, ug mipasiatab gilayon pagpangutana kon unsay suliran sa mga lumolupyo didto.  Gitubag siya nga duha lang ang ilang suliran; ang una, walay health workers ang ilang health center.  Daling milanit ang mayor sa iyang cellphone ug gimandoan kunohay ang municipal health officer sa pagpadala’g mga health workers.  Ug sa dihang nangutana ang mayor kon unsa ang ikaduha’ng problema, gitubag dayon siya nga, “Walay signal sa cellphone ang among lugar Mayor.”  Pagkatoytoy!

Kinsa, dili unsa’y nahibaw-an

Nangayo ang TESDA og dugang nga P8.5 million sa ilang 2025 budget aron ilang magamit sa pagbutang og mga security features sa mga certificate nga gipanghatag sa maong buhatan taliwala sa pagkuyanap sa mga pekeng certificate.  Magamit ang certificate nga gihatag sa TESDA sa pagpanarbaho ug usahay isip basehan sa pag-usbaw sa sweldo.  Apan alang sa akong amigo,  “Karong panahona, dili na importante kon unsay imong nahibaw-an; ang importante karon mao nga kon kinsay imong nahibaw-an.”  Madahaan!

Pagdumala sa ‘missing’

Gipaubos sa tulo ka adlaw nga training ang mga district social workers ug mga direct service implementers sa Social Welfare and Development Office sa dakbayan sa Davao kabahin sa pagdumala sa mga patay ug mga missing nga tawo.   Komentaryo sa akong amigo, “Mora’g dunay sayop sa pagtaho sa maong balita, kay unsaon man nimo pagdumala sa tawo kon “missing” pa siya?  Tubag sa akong laing amigo, “Basin ang topic sa ilang training mao nga unsaon ang pagpangita sa missing nga tawo, aron naa na’y dumalaon.”  Fezteleern!