Pag-inabtik gyud

Dili tiaw ang problema nga giatubang karon nila ni suspended Cebu City Mayor Michael Rama ug Mandaue City Mayor Jonas Cortes nga parehong gi-dismiss sa Ombudsman.

Sila si Rama ug Cortes gusto gihapon nga magpasubli sa ilang pagka mayor, apan ang problema kay gawas sa dismissal sa serbisyo, dili na sila tugotan nga matudlo og bisan unsa nga katungdanan sa kagamhanan.

Aw, hinuon, ang hukom sa Ombudsman mahimo pa nga mausab kon ang mga abogado nilang Rama ug Cortes makakumbinser sa Court of Appeals ug Supreme Court nga nasayop ang Ombudsman sa ilang hukom.

Apan kon hinay ang ilang mga abogado nga mohimo og mga legal remedies, mahimong ang mga nga’n nilang Rama ug Cortes dili na maapil sa balota nga gamiton sa eleksyon sunod tuig, mao nga angay silang mag-inabtik.

Naka-file na hinoon ang mga abogado ni Rama og Petition for Certiorari didto sa Supreme Court aron matan-aw kon tukma ba ang hukom sa Ombudsman.

Si Cebu City Acting Mayor Raymond Alvin Garcia, mipahibawo nga human sa hukom sa Ombudsman nga nag-dismiss ni Rama sa katungdanan, giisip na niya ang iyang kaugalingon nga “full-fledged mayor.”

Gani, si Mayor Garcia mipatuman na og daghang kausaban sa Cebu City government, ug misaad nga ang iyang pagdumala sa kagamhanan sa siyudad dili niya usik-usikan ang kwarta sa katawhan.

Sa pagdumala ni Raymond sa siyudad gikan niadtong Mayo, nakadaginot ang Cebu City government og minilyon ka pesos kay iyang gilaslasan ang budget sa ubang gastohanan.

Una niini, ang P11 milyones nga gi-budget alang sa pagpahigayon sa Independence Day, gihimo na lang niya nga P3 milyones kay gitangtang ni Raymond ang P8 milyones nga gastohon unta aron dunay taga barangay nga manayaw gikan sa Plaza Independencia paingon sa SRP.

Nakadaginot sab ang Cebu City government og kapin sa P200 milyones, kay gilaslasan ni Raymond ang kapin sa P400 milyones nga budget sa miaging Pambansang Palaro.

Bisan og gilaslasan ni Raymond ang dakong budget sa Palaro, nakita nga malampuson gihapon ang maong kalihokan. Unta, matuman ang tinguha ni Raymond nga ang nadaginot nga kantidad ipalit og mga tambal para sa Cebu City Medical Center.

* * *

Karon diay’ng adlawa nga ang grupo nila ni Mayor Raymond moduso na sa ilang Certificates of Candidacy ngadto sa Comelec. Si Atty. Joey Daluz III maoy iyang tandem pagka bise mayor.

Tukma ni kay si Raymond taga north district, ug si Daluz taga south district.

Ugma, sila si Cebu City Councilor Nestor Archival ug Tommy Osmeña moduso sab sa ilang COC sa Comelec pagka mayor ug bise mayor.

Gahapon, si kanhi PDEA Regional Director Yogi Ruiz mi-file na sab sa iyang COC pagka mayor.