Knights lusot sa Altas via triple overtime

MANILA, Philippines — Nilusutan ng Letran College ang University of Perpetual Help System DALTA via triple overtime, 82-73, sa NCAA Season 100 men’s basketball tournament kahapon sa FilOil EcoOil Centre sa San Juan City.

Kumolekta si guard Deo Cuajao ng 19 points, 5 rebounds at 3 assists habang bumida si Jimboy Estrada sa third overtime para sa three-game winning streak ng Knights at solohin ang second spot bitbit ang 5-2 record.

Nagwakas ang two-game winning streak ng Altas para sa 4-3 marka.

Si Kevin Santos ang nagdala sa Letran sa first overtime, 52-52, mula sa kanyang putback sa huling 6.4 segundo sa regulation.

Sa unang laban, ginulantang ng Arellano University ang nagdedepensang San Beda University, 72-70.

Umiskor sina JL Capulong at T-Mc Ongotan ng tig-13 points para sa 2-5 baraha ng Chiefs at nag-ambag si Ernjay Geronimo ng 12 markers, 4 rebounds at 3 assists.

Nahulog ang Red Lions sa 3-3 marka.

Bumangon ang Arellano mula sa isang 13-point deficit para agawin ang 72-67 abante mula sa basket ni Capulong sa huling 44 segundo ng fourth period.