El Niño gihapon bisan ting ulan na

Bisan og nasinati na karon ang ting-ulan, gani aduna nay mga bagyo ang nakasulod sa nasud apan adunay dapit sa dakbayan sa Sugbo ang wala makabatyag niini kay alang kanila nagpadayon ang panahon nga sama gihapon sa huwaw mugna sa El Niño phenomenon o wala pa ka move on, gustohon man nila nga makalingkawas na apan dili mahimo kay magdepende man kini sa aksyon sa tinubdan sa ilang tubig.

Kini ang sitwasyon sa pipila ka mga mga sitio sa Barangay Sambag Dos sa dakbayan sa Sugbo nga magpulaw sila aron lang makasalod og tubig kay panahon ra sa oras tingkatulog moagas ang tubig sa ilang gripo, busa mamundo sila og tubig nga ilang magamit.

Kining maong suliran dugay na diay kaayo panahon pa sa pandemic ug naabtan nalang og kusog nga bagyo ug dayon sa el niño ug karon ting ulan na usab mao ra gihapon ang ilang sitwasyon.

Dili mominus sa usa ka gatos ka mga balay ang naapektohan niini nga mipadangat sa ilang yangongo sa water utility. Dili hinuon hiniusa kon dili kada bayad lang nila sa ilang water bill ilang ipadangat ang ilang problema ug wala gyud matagad.

Hinungdan nga nagpatabang nalang sila sa media basin mapukaw kuno ang hingtungdan nga maaksyonan ang kalbaryo nga ilang nahiaguman. Dugang sa ilang kabalaka karon nga midaghan ang kaso sa dengue sa dakbayan ug ang usa sa gitumbok nga hinungdan ang pagsanay sa mga lamok diin paborito kaayo ang mga pinundo nga tubig nga kong dili matarong og tabon himoong salag sa lamok nga nagdala og dengue. Gani aduna nay mga kaso sa balatian sa ilang dapit.

Gipadangat nako ang problema sa mga tawo ngadto mismo sa buhatan sa Metro Cebu Water District kon MCWD ug wala masayod sila sa sentimiento sa mga molupyo kay wala nakaabot sa kadagkoan ang reklamo. Seguro kadtong giingon sa mga molupyo nga nagbayad sa ilang water bill kutob ra sa teller ug tungod kay busy man ang teller wala mapadangat ngadto gyud sa departamento nga moatiman sa mga problema.

Gipadayag sa tigpamaba sa MCWD nga nagdahum gani sila nga nakabenepisyo na ang dapit sa serbisyo sa supply sa tubig gikan sa Lusaran nga nagsugod na niadtong nakalabay’ng tuig. Hinuon posibleng hinungdan nga nakita sa water utility ang wala pa ma upgrade ang tubo o gikinhanglan pa nga i-rehabilitate aron makaagi gyud ang water supply.

Gipasalig sa MCWD nga aksiyonan dayon ang gipadangat nga problema dungan sa pagmando sa ilang mga personnel nga susihon ang sitwasyon mga molopyo nga nag antos sa kakuwang sa tubig sa ilang dapit.

Manghinaut kita nga dili lang kutob sa estorya kon dili makita gyud nato ang kasulbaran sa problema.

Kong duna man gyuy solusyon nga mahimo sa daling panahon mas maayo kay dili lalim nga maglaway lang intawon sila sa ubang dapit nga nanghinubra ang tubig samtang sila nag uga. La Niña naman kaha nganong el niño pa man lagi kining dapita.

Atong atangan kon matinuod ba nga masolusyonan kini, in fairness sa MCWD murag sensiro man ang ilang daad busa atong paninglon inig abot sa panahon.