Apollo miampo, mga sungayan natakilpo

Na-monitor nako pinaagi sa YouTube channel ang September 8, 2024 Kingdom og Jesus Christ (KOJC) ‘Lulusubin ng Philippine National Police (PNP) Operation’ nga gi-live coverage sa SMNI vlogger Master Judea, kinsa sulod sa ilang SMNI office compound, diin may mga bahin nga bildo, gisundan g'yud sa iyang kamera ang nag-abot-abot mga tropa sa kapolisan, kinsa may mga nagtapok sa gawas ug usab may mga nagpanon nga nanulod sa nahingawa na kaayong compound.

Hangtod miabot ang sitwasyon nga ang libolibong nanagbarog-nagbarikadang kapolisan, kinsa mandar na lang sa ilang labaw ang gihulat, may pipila nga  namahid sa ilang luha samtang nagsud-ong sa nagkahiusang KOJC members nga diha sa ilang atubangan, kinasingkasing nanag-awit-nag-ampo ug daw gisalig na lang ilang kinabuhi sa Kahitas-an ingkaso"g moabot kanila ang kamatayon ning maong delikadong panag-engkuwentro sa mga sungayan batok mga anghel.

Sa wala pay alas 7:00 sa gabii, ingon sa gidungog ilang hugot pangilaba. Kalit lang, miatras-mipalayo sa ilang gibarikadahan ang kapolisan ug nag-iyahay'g panglakaw paingon sa gawas. Diay, i-pull out na sila tanan. Mga SMNI vloggers nahibulong. Unsay nahitabo?

Unya, may miteks-pahibalo nga nadakpan na kuno si Pastor Apollo Carreon Quiboloy. Gi-post kini sa Facebook page ni DILG Secretary Ben Hur Abalos ug gipakatap dayon sa ABS-CBN ug ubang mainstream media. Apan maglisod pagtuo ang SMNI vloggers ug KOJC members sanglit wala man silay nakit-ang Pastor Quiboloy nga gidakop sa sulod. Ug motuo lang sila kon SMNI media nay mokonpirma.

Tuod, nasayran nila tinuoray'ng nahitabo. Walay nadakpang Quiboloy ang kapolisan. Kondili, ang pastor mismo maoy miampo ngadto sa Intelligence Service of the Armed Forces of the Philippines (ISAFP) ubos sa gikasabotang kondisiyones apil na ang DILG. Diin usa niini mao ang pag-news blackout, o pagtago sa maong hitabo sa media. Pero gisupak kini ni Abalos, kinsa mahilig sa pagpamakak ug  grand standing-credit grabbing.

Maong sa FB account niya, iyang gipasiatab: ‘Nadakpan na si Quiboloy.’ Bisag ang tinuod, misurender-miampo ngadto sa ISAFP ug walay PNP ang nakasikop.

Niining pag-ampo sa pastor, ubay-ubay'ng sungayang media, internet trolls, kapolisan lakip na sila Abalos-Marcos-Torre-Marbil ang nangatakilpo ug mangatakilpo pa sa umaabot nga mga adlaw. Makabawi pa kaha sila? Ato ning atngan!