Stratehiya sa pangampanya

Nakigtagbo si Speaker Martin Romualdez sa 27 ka gobernador sa nasud aron awhagon sila sa pagtabang sa kawsa sa kagamhanan pagpakigbatok sa kakabos.  Sa pag-ingon ni Romualdez nga sinugdanan pa lamang kining gihimong panagtagbo, mora’g makaingon kita nga  gihimo ra man nga rason ni Romualdez ang kakabos sa katawhan apan ang tinuoray nangandam na siya sa eleksyon sa 2028.  Ang sayo nga pagpaduol kanila maoy labing maayo’ng stratehiya. Makapahinumdum sa akong higala nga kon aduna siya’y bag-ong ikahimamat, iya kini’ng lamanohon dayon ingon nga, “Tawga lang nya ko’g ‘Mangaon na.’”  Madahaan!

Asa ko ‘too!

Adunay dili momenos P30 milyones nga kantidad sa mga gipayuhot nga mga panakot nga gikompiska didto sa bodega dapit sa Navotas kay giingon’g positibo kini sa mga residue sa pesticides ug uban pa’ng microbioligical contaminants.  Namahayag ang kalihim sa Agriculture nga si Francisco Tiu Laurel Jr. nga dugmokon ang maong mga panakot aron dili maghatag risgo ug kadaot ngadto sa mga konsumidor.  Bisan pa ni’ng pamahayag, gituohan nga walay mahimong pagpangdugmok sa maong panakot ug pahimuslan gihapon kini sa mga kanahan.  Ni’ng pamahayag sa kalihim, adunay haum nga tubag ang mga bata: “Asa ko ‘too!”  Fishkots!

Dili na motrabaho

Misaka na usab ang unemployment rate sa Pilipinas ngadto sa 4.5% sa buwan sa Hulyo. Ang gitumbok nga hinungdan mao nga nidaghan usab ang mga Pinoy nga nag-edad og 15-24 ang nahadugang sa workforce apan wala pa makakaplag og trabaho. Segun sa akong higala dili tinuod nga wala makakaplag og trabaho ang mga batan-on kon dili, wala gayod sila manarbaho  kay naa ma’y programa sa gobyerno sama sa 4Ps, TUPAD, SLP, KALAHI, etc.,.  Baligho hunahunaon nga tungod ni’ng maong mga programa, gipatungan og makabuktot nga buhis kadtong naningkamot aron lang ipanghatag niadtong mga tapolan.  Fezteleern!

Lagda sa transparency

Gikwestiyon ni Cebu City Councilor Nestor Archival Sr. ang dul-an sa P20 milyones nga budget nga gisumite sa DEPW alang sa pag-rehabilitate sa City Hall Legislative Building.  Walay gisukip nga plano ang budgetary estimates nga mao untay basehan sa paghimo sa Program of Works and Estimates. Gawas nga kinahanglan mosumite og detalya nga cost estimate ang DEPW, kinahanglan usab nga ma-esplikar ang rason ngano sa giproponer nga rehabilitation.  Kinahanglan nga transparent ang proyekto subay sa lagda sa pangagamhanan.  Kay kon dili, basin mahaum ang maong proyekto sa pagya nga, “Hanap pa’s diyes panas.” Muleeng!

Himoon’g pulbora

Maghuwat pa gyud og diyotay’ng panahon ang mga kabos nga senior citizen una sila makapahimulos sa libre’ng bakuna sa flu tungod kay nare-sechedule na usab sa DOH ang bidding sa maong bakuna.  Dili malalis ang kamahinungdanon sa maong bakuna apan ang kalangan sa pagpalit sa maong flu vaccine daw nagpadayag sa walay pagpakabana sa DOH sa mga tigulang.  Nakahinumdum na lang hinoon ko akong apohan nga sa tumang pagmahay, miangkon nga, “Wala na ma’y probitso kaming mga tiguwang. Angay na lang mi himoon’g pulbora o ba kaha vetsin.” Pagkatoytoy!