Ministry of Deliverance Team

(Ikaduhang Bahin)

Mga Pag-Atiman nga Pastoral Alang sa mga Sakop sa Pagpangalagad Alang sa Kalingkawan ug Eksorsismo

Dili maayo nga mokumpiyansa sanglit ang kaaway nga mao ang yawa mahimong mobalik sa gihugpaan niini ug magdala pa og laing mga Espiritu nga mas ngil-ad pa kaniya! ang Ebanghelyo ni Lukas nagkanayon:

“Sa panahon nga mogula sa usa ka tawo ang usa ka daotang Espiritu, magsuroy-suroy siya sa mga dapit nga mamala ug mangitag dapit na iyang kapahulayan. Kun dili siya makakitag dapit moingon siya: MOBALIK LANG AKO SA AKONG GIPUY-AN KANIADTO. Busa mobalik siya makakaplag sa balay nga nahinlo ug maayo na pagkapahimutang ang mga kasangkapan niini. Mogula siya ug magdalag laing pito ka mga Espiritu nga labi pang daotan kay kaniya ug manulod sila ug mopuyo didto. Busa sa katapusan ang kahimtang niadtong tawhana mahimong labi pang dautan kay sa sinugdanan.”

Busa angayan lamang nga magbinantayon ug magmaigmaton kita. Atong bansayon adlaw adlaw nga anaa kita sa presensiya sa Dios ug kay anaa man kita sa iyang presensiya, likayan nato ang sala nga maoy makapapahawa nato gikan sa iyang presensiya.

Sa Paagi nga Lihokon ang Matag Kaso nga Atimanon sa  Pundok (Deliverance Team)

Ato ning malangkob sa pulong nga KUKANG

Kinsa ang biktima (Edad, gender, family background)

Unsay nahitabo (naglangkob kini sa mga Panghitabo ug kasinatian nga nasinati sa pasyente kun biktima, unsang matanga sa kaso nga dili ordinaryo nga nitakboy sa biktima. (obsession, infestation, possession ba? O ang Diabolic subjugation[10] ba?

Kanus-a Nahitabo. Ang sinugdanan  Mas maayo nga masayran ang gidugayon ug ang tukmang petsa o bulan nga nagsugod ang suliran.

Nganong Nahitabo. Ang ganghaan kun opening kun nganong nahitabo ang maong pagpanghasi sa demonyo sa kinabuhi sa biktima. Niapil ba siya occult games, may nitunglo ba, etc.

Dugang niini mao ang paghimo ning mosunod nga mga lakang:

A. Panghimayad diin human masayri ang mga bisyo ug sala nga nahimo mohimo og pagbag-o sa kinabuhi ingon man panghimayad sa mga sala.

B. Paghingilin ginamit ang pag-ampo nga angay sa suliran. Pananglit kun ang biktima dunay dakong kalambigitan sa occult ug divination kinahanglang gamiton ang Eksorsismo batok sa Occult and Divination nga pangulohan sa usa ka Eksorsista ginamit ang Roman Ritual Vol. II o dili ba kaha ang biktima ilawom sa usa ka tunglo mahimong gamiton ang Pag-Ampo ni San Cipriano sa Nicomedia. Sama gud pananglit sa tawo nga dunay sakit sa tiyan ug nagkalibanga lisud man paimnon nimo og biogesic kun ang iyang gikinahanglan diatabs?

C.  Espirituhanong Paggiya diin ang biktima kun pasyente mabuot nga mopailawom sa usa ka pari aron magiyahan siya alang sa iyang espirituhanong pagtubo, paglambo ug paghamtong. Tumong niini aron matabangan ug mapanalipdan ang biktima kun pasyente aron dili siya mahikalimot sa iyang kahimtang nga nagkinahanglan gyud kaayo ug dugang pag-atiman.

D. Pagpaambit ug Pagsaksi. Ang maong kasinatian, kasinatian sa grasya mamahimong mopaambit sila sa ilang kasinatian sa kalingkawasan aron sa ingon mamahimong madasig usab ang uban nga makigbisog aron pakigbatokan ang mga demonyo o mga yawa nga ilang gikahibalag. Human sila mamayo sila mamahimong mga Maayong Balita kanila nga nahiagom usab sa ilang naagian. Sila ang mga buhing mensahe nga dili gyud mahitabo nga magmadaugon ang gahum sa kangitngit batok sa gahum nga Diosnon. (Padayonon)