Ministry of Deliverance Team (Unang Bahin)

Mga Pag-Atiman nga Pastoral Alang sa mga Sakop sa Pagpangalagad Alang sa Kalingkawan ug Eksorsismo

Mga Ang-ang Sa Pag-Atiman

1. Ang Gawi kun Taras nga Pagahuptan

Mahinungdanon kaayo nga ang mga miyembro makahupot og hustong taras kun gawi alang sa pangalagad alang sa Kalingkawasan ug Eksorsismo. Mahinungdanon kaayo ang matag miyembro sa dili pa motabang sa uban iya unang hatagan og hustong han-ay ang iyang kinabuhi. Nga sa ato pa ang hingtungdang miyembro ang kinahanglang mohimo ning mosunod:

a. Paghinulsol sa mga sala nga nahimo ug pagdawat sa kapasayloan niini ingon man himoon niya ang Pagkamapasayloon ingon nga kagawian.

b. Iyang I konsagrar ang iyang kaugalingon ngadto sa Balaang Kasingkasing ni Jesus ug Putli nga Kasingkasing ni Maria.

c. Masinugtanon siya sa Balaod ug Pagtulon-an sa Simbahan.

d. Ang iyang kinabuhi, banay, patigayon kinahanglang anaa sa landong sa mga Kristohanong Sukaranan.

e. Sa kinatibuk-an, andam ug tagana siya nga ihalad niya ang iyang kaugalingon ug ang tanan ngadto sa Dios nga maoy tag-iya sa tanan nga nahuptan.

2.  Sa Paagi nga Dawaton ug Palihukon ang Matag Sakop

Ang Tagdumala kinahanglang tataw kun klaro diha sa paghatag sa mga gimbuhaton sa matag miyembro. Sa Sinugdanan pa lang daan kinahanglang masayod na ang matag sakop sa mga gimbuhaton. Sama pananglit sa mga prayer leaders, ang tig-andam sa luna, ang mohimo sa documentation, ang mga prayer warriors etc. ang tagdumala maoy mopasayon aron ang matag sakop nga natahasan masayud nga gihatagan siya sa maong buhat sanglit iya man kining gasa ug katakus. Ang matag usa molihok segun sa iyang katakus.

3. Kukabildo ug Pamalandong

Ang pulong kukabildo nagasukad man sa pulong bildo diin nahimong abli ug kita kaayo ang tanan sanglit nilapos man sa bildo ang panan-aw. Ning paagiha ang matag miyembro kun sakop kinahanglang mamahimong “hubo” atubangan sa Dios pinaagi sa pagladlad sa iyang kaugalingong kinabuhi ngadto kaniya. kuyaw kaayo kun dunay tinagoan sanglit ang yawa mahimong mogamit niini alang sa kaalautan.

Hinumdomi nga usa sa mga timaan sa certified case of demonic possession mao man ang retrocognition diin sayud siya sa imong kagahapon. Ug kahibalo sa mga butang tinago. Pinaagi lamang sa makanunayong kukabildo inabagan ang pagpamalandong mas makita sa halawom nga paagi ang suliran nga nahiagoman sa pasyente ug sa mga posibleng suliran nga mahiagoman sa matag miyembro.

Gikinahanglan gyud ang pamalandong aron mas mailhan ug unsa o kinsa ang mga dautang Espiritu nga anaa sa biktima kun pasyente. Pinaagi lamang sa pag-ila sa yawa nga anaa, masulbad ang suliran.

4. Panghimayad

Matud pa ni San Agustin: “Bisan gani ang mga pinakadautang makasasala ang mahimo man pud nga mga santos!” Nagpunting kini sa dakong bili sa paghinulsol. Nunot niini ang pag-usab sa kaugalingon ingon man ang panghimayad sa bisan unsang kalapasan. Dili paigo ang mangayo og pasaylo kay naguba ang koral katungdanan usab sa nakaguba ang pag-ayo niini. Atong hinumdoman nga matag santos dunay  kagahapon ug ang mga makasasala adunay kaugmaon!

5. Ang Paghingilin

Human mailhi ang demonyo isunod dayon ang paghingilin kaniya. Ning paagiha human masayri sa hingtungdan ang iyang mga kahuyangan ug ang sala nga nakapaluya kaniya. angayan lamang nga ang maong sala nga gipaluyohan sa demonyo ang kinahangalang mahinginlan aron mabatonan niya ang kalingkawasan sa dili pa siya motabang aron makalingkawas ang uban. Si San Juan Bosco nagkanayon: “Kun buot nimo luwason ang kalag sa uban, luwasa daan ang imong kaugalingong kalag!”

6. Ang Kaayohan

Human ang hingtungdan nakalingkawas sa bisan unsang gapos ug baligtos mahinungdanon usab kaayo nga lihokon uban ang matinud-anong pag-ampo ug pagtuo ang kaayohan. Ang pagkabilanggo sa mga patuo-tuo, pagkabilanggo sa mga pagdumot ingon man mga sala ug bisyo nga maoy dakong babag alang sa kalingkawasan. Ampoon segun sa panginahanglan ang mga pag-ampo alang sa lawasnong kaayohan [2] espirituhanong kaayohan [3] kaayohan sa pagbati ug kahiladman. [4] Ang tanan konektado ug dunay kalambigitan ang atong lawas, hunahuna, ug Espiritu busa nagkinahanglan kini og kaayohan. [5] Gigamhan sa Espiritu Santo

Hinumdomi nga dako usab og tampo ang Espiritu Santo. Kinahanglan nga sangpiton ang Espiritu  Santo aron maoy mopuno sa mga luna nga gibiyaan sa dautang mga Espiritu. Kinahanglang mapuno sila sa mga gasa sa Espiritu Santo. Ang Obispo diha sa Sakramento sa Kumpirma ang moampo ning mosunod human niya ipandong ang iyang mga kamot sa ulo sa kompirmahan.

“O Dios nga makagagahom sa tanan, Amahan sa among Ginoong Jesu-Cristo pinaagi sa tubig ug sa Espiritu Santo, imong gihatagan og bag-ong kinabuhi kining Imong mga alagad ug sa ingon giluwas mo sila gikan sa kasal-anan.Pakunsara kanila ang Espiritu Santo, ang Parakleto. Hatagi sila sa Espiritu sa Kinaadman ug Salabutan, sa Espiritu sa Tambag ug Kalig-on, sa Espiritu sa Kahibalo ug Kamakidiyosnon. Pun-a sila sa Espiritu sa Pagtahud kanimo. Kini among Gipangayo pinaagi ni Cristo among Ginoo. Amen.”

Ang tawo nga gigamhan sa Espiritu Santo ang makapahimulos sa mga bunga niini. Matud sa Sulat ni San Pablo ngadto sa Taga-Galacia:

“Apan ang Espiritu naghatag sa gugma, kalipay, kalinaw, pailob, kalooy, kaayo, pagkamaminatud-on, pagkamapaubsanon ug pagkamapinugnganon sa kaugalingon. Kining mga butanga wala mahisupak sa bisan unsang balaod.”

7.  Espirituhanong Giya sa Panaw sa Kalingkawasan [8]

1. Dili paigo nga makalingkawas na ang hingtungdan kinahanglan niya ang usa ka after care nga pag-atiman por lo menos sulod sa usa ka tuig.

2. Dunay kauban nga mogiya sa hingtungdan.

3. Himoon ang pagpasabot sa mas dayag ug konkreto nga paagi sa programa o laraw nga subayon human sa sesyon sa kalingkawasan. (Padayonon)