Nukos-nukos ni VP Sara

Human sa gipakitang taras ni Bise Presidente Sara Duterte atol sa budget hearing didto sa Senado ug Kongreso, inanay'ng nabisto ang iyang kakuwangan nga mamahimo untang sunod nga presidente sa nasud.

Ang iyang kapakyas pagtubag og tarong sa mga pangutana gikan sa mga Senador ug sa membro sa House committee on appropriations nagpakita sa iyang immaturity ug sa pagkadili pa hinog nga mamahimong presidente.

Ang iyang mga supporter tingali moingon nga tinuod lang gyud siyang tawo ug dili plastik nga sama sa kadaghanan sa mga politiko.

Tugotan ta nga ingon siya niini---dili plastik. Apan ang usa ka maayong opisyal kamao modawat og responsibilidad.

Isip opisyal sa gobiyerno iyang responsibilidad nga hatagan og husay ang mga magbubuhis giunsa niya paggasto ang pundo sa iyang opisina.

Kabahin sa proseso pagbuhat sa budget sa nasud ang pagpangutana sa mga magbabalaod sa dili pa nila ipasar ang nasudnong budget kun giunsa paggasto ang niaging budget aron ilang masuta angayan ba nga ihatag ang gipangayo niini alang sa sunod tuig o minusan.

Bisan pa og wa kaayon ang bise presidente sa mga nangutana niya, tungod tingali kay sa iyang tan-aw mga hipokrito ug hipokrita, apan angayan niyang hinumduman nga mga pinili pud sila sa katawhan sama niya.

Gawas pa bisan di ta kumbinsido sa kridibilidad sa mga opisyal nga nangutana apan dili ikalimod nga balido ang ilang mga pangutana.

Busa inay nga manginsulto ug mamuyboy sa mga nangutana niya, maayo untang gitubag ug gipasabot niyag maayo sa publiko giunsa ug hain niya dad-a ang buhis sa katawhan.

Sa gihimo sa bise presidente nga pagnukos-nukos atol sa budget hearing iyang giguba ang iyang kaugalingon ug ang hayag unta nga kahigayonan niya nga mahimong sunod nga presidente.

Mas nasabtan sa publiko ang iyang gipakitang batasan dihang nigawas ang audit report sa Commission on Audit nga nagmando niya pag-uli sa dakong bahin sa iyang P125M nga intelligence fund nga gigasto lang sud sa 11 ka adlaw tungod kay kwestiyonable ang iyang paggasto.

Mas nasabtan sa publiko nga tungod kay di man niya maisplikar ang paggasto maong iya nalang ipaagi sa pagpanginsulto ug pagpamuyboy sa mga tawong mikwestiyon giunsa niya pagwaldas ang buhis sa katawhan.

Tipikal nga kinaiya sa usa ka spoiled brat nga dunay taas nga posibilidad nga mamahimong usa ka diktador.