Gikiha ang tanang heirs

Dear Atty. Divine,

Ang akong inahan uban sa iyang tulo ka igsuon naka inherit sa property sa ilang mga ginikanan. Gibahin bahin na nila ang property apan ang titulo wa pa mabu-ak. Karong bag-o adunay mi claim sa portion sa property nga share sa igsuon ni mama. Mi-file og kaso sa korte ang claimant Ug giapil og kiha ang tanang heirs lakip na ang akong mama.

Matud pa sa igsuon ni mama nga kinahanglan motampo silang tanang heirs alang sa gastuhan sa maong kaso. Ang akong pangutana, ma-obligar ba og gasto sila mama sa maong kaso nga dili man siya affected, kay portion sa share sa iyang igsuon man ang gi claim? Sakto ba nga giapil og kiha ang ubang heirs? Daghang salamat. -- Ramon

Dear Ramon,

KUn ang property nakapangan pa sa original owner nga patay na, ang mga heirs niini mao gyud ang ma involved sa kiha kay sila man ang maapektuhan sa adverse claim. Sa kaso sa imong mama, ilang gibahin-bahin na ang property apan ang titulo wa pa mabu-ak busa silang mga heirs co-owners pa sa maong yuta.

Samtang bisan tuod kUn ang share sa usa ka igsuon lang ang naapektuhan sa adverse claim, obligado gihapon ang mga heirs nga motabang og gasto sa maong kaso kay kun modaog ang claimant, maapektuhan man sab ang ilang share kay kadtong nahibilin nga yuta kinahanglan man ‘to nga bahinon in equal share sa tanang heirs. Busa kun pananglit ang yuta 1600 square meters unya nakuha sa claimant ang 200 square meters niini kay nakadaug siya sa kaso, then ang nahibilin nga 1400 square meters mao nay bahinon in equal share sa mga heirs, so mogamay ang share sa matag heir kun modaug ang claimant. Thank you and God bless!

Atty. Divine

Alang sa inyong pangutana, palihug lang sa pag-email sa [email protected] ug akong tubagon ang inyong pangutana pinaagi sa akong column matag Miyerkules, Sabado ug Domingo.