Pataka nga libro
Kon gihilom pa lang ni Bise Presidente ug kanhi Education Secretary Sara Duterte Carpio paghatag ang iyang librong “Isang Kaibigan” ngadto sa mga tinun-an, nakit-an na untang iyang nawong ug ngalan sa mga ginikanan nga maoy tinuod niyang tuyo nga pahinumdoman inig adto nila sa mga presinto unya sa 2028.
Pero wala siya maanad sa yano nga pamintaha. Dili siya andam nga mogasto sa iyang kaugalingong kuwarta, o sa kuwarta sa iyang mga tigpaluyo nga dili unta magmakuli pag-amot, sa pagpahimulos sa pabor nga dili magamit sa iyang mga kaatbang nga wala sa gabinete.
* **
Kay niinsistir man nga mga magbubuhis ang pagastuhon og P10 milyones para sa libro, nitumaw na hinuon ang mga komplikasyon nga dili makatabang sa bise presidente:
Daghan diayng mga sayop ang libro; nga
Nakurhian unta kon nisubay pa sa naandan nga proseso sa pagsuwat, pagtuon ug pagpublikar sa mga libro; pero
Gilaktawan ang proseso kay ang opisyal nga mao untay mopatuman sa mga lagda mao ra man sab ang, nakatag-an ka, nagsuwat sa libro; mao nga kon aprobahan sa Kongreso
Mahimong makadaot imbes makatabang sa mga bata ang libro.
* * *
Mameligrong maligsan ang pataka nga proyekto sa mga lagda sa burukrasya:
Sa dili pa gastohan og kuwarta sa gobyerno, kinahanglan nga ipabasa sa mga bata ang libro aron pagsusi masabtan ba nila ug ipasubli sa mga eksperto sa libro sa mga bata; ug
Subayon pa kon paapilon ba ang Office of the Vice President sa pagprinta og libro o isalig sa mas kamao nga National Printing Office o National Book Development Board.
* * *
Imbes mag-usik og panahon sa pagpangugat sa libro, mas maayong tutokan sa bise presidente ang pagpasiugda og mga proyekto nga mapuslan sa mga labing tabanganan (kana kon gawas sa pamolitika ganahan sang moserbisyo). Kay sukwahi sa mensahe sa libro iya mang giaway ang Kongreso ug Malakanyang, mahimong laslasan ang mas dakong budget nga iyang gipangayo para sa 2025.
Bisan ang 32 milyones ka botante nga gisigehan og pangangkon nga maoy nibutang niya sa puwesto dili makalalis: Nga mas takos nga mapatuman ang iyang mga programa sa mga ahensiya sa gobyerno nga, nakatag-an ka, maoy iyang gikopyahan ug gisapawan.
- Latest
