Ang kamahinungdanon sa Santos nga Misa

Ikatulong bahin

6. Pag-ampo, pagdangop sa mga Sakramento ingon man ang paggamit sa mga Sakramentales uban ang tumang gugma ug debosyon.

Ang hinabang sa mga kalag sa purgatoryo batok sa mga dautang mga espiritu

Niadtong bata pa ako, nahimo akong usa ka sacristan sa among Parokya sa Catmon, Sugbo. Sa maong Parokya nahimong Batasan nga matag alas otso sa kagabhion bagtingon ang lingganay alang sa agonias. Pasabot kini nga takna na aron mogahin og igong kahilom pahinungod sa mga kalag sa purgatoryo.

Gibati pa namo ang kahadlok kaniadto kay lagi, kuwang sa kabuot ug kahibalo. Ngitngit pa ang sulod sa simbahan kay limitado lamang ang sugang dagitabnon.

Mosaka pa kami sa kampanaryo kang kansang hagdan magtuya tuya. Karon nga pari na ako, diha pa ako nakatugkad kun nganong kinahanglang magdebosyon kita sa mga kalag sa purgatoryo. Sila kadtong atong mga higala nga dili man tuod makatabang sa ilang kaugalingon apan makatabang sila kanato.

Ang atong mga pag-ampo ug mga pamisa alang kanila makatabang aron ilang mataak ang Paraiso nga gipangandoy nila ug nato.

Sa laing bahin, sila usab ang motabang kanato labina gyud batok sa atong mga kaaway nga espirituhanon.

Sila ang mag-una kanato diha sa pakigsangka sa mga dautang Espiritu. Agig debosyon alang kanila, atong igahin ang matag alas otso sa gabii alang sa kapahulayang dayon sa ilang mga kalag. Padayonon sunod gula