EDITORYAL - Naglibog lang gihapon sa PUVMP?

Molusad karong adlawa og picket ang mga drayber ug operators sa pasaheroan nga padayung supak sa gipatumang modernisasyon sa public transport system.

Didto sa kaulohan gikatahong mahitabo ang dagkong protesta nga sa pangangkon pa sa mga nag-organisar lapad kini ug daghan gyung mga pasahero ang maapektahan.

Tingali didto maapektahan gyud tungod sa kadako sa ilang populasyon kun itandi dinhi sa Sugbu.

Kay bisan tuod og mas daghan na karon ang mga modernong pasaheroan didto, naa pa gihapoy mga rota nga ang gisaligan sa mga sumasakay mao kining mga karaang pasaheroan. Kaning ilang protesta balik-balik naman, ang ilaha lang gyud nga matagad ang ilang mga yangungo kay lagi hangtud karon naglibog pa sila gihapon aning Public Utility Vehicle Modernization Program (PUVMP).

Nangangkon ang usa sa mga grupong nag-organisar sa protesta nga ‘mayoriya’ pa sa mga transport operators ang naglibog aning implimentasyon sa PUVMP.

Naglibog? Unsa man diay ni kalisod sabton, sama sa mga subject sa engineering o medisina? Kay lisud man?

Kun gieskuylahan pa tingali ni sukad sa pagsugod, masters’ degree o doctorate degree na ang nahuman.

Pila na ka presidente ang nanglabay nga gituki kini, gidebatihan hangtud nahimong balaod ug nasugdan niadto lang nakalabay nga administrasyon, apan hangtud karon wala pa gyud masabti ug makalibog pa gihapon?

O dili lang gyud gusto motuman sa kausaban nga mao naman gyud unta karoy gusto sa publiko nga sumasakay, moderno, hamugaway ug luwas nga public transport system. Kinsa may namakak, ang mga nag-organisar aning maong strike o ang taga Department of Transportation (DOTr) nga nag-ingong mayoriya na sa mga PUV operators sa Pilipinas ang consolidated na.

Kining sa DOTr nga pangangkon suportado og mga papeles, resibo ug dokumento nga gipansumitir sa mga transport groups, operators, kooperatiba ug mga drayber.

Kaning organizer sa transport strike naa ba siyay ikapakitang sama niini nga kamatuoran aron tuohan iyang pangangkong “mayoriya pa” sa transport sector ang naglibog sa PUVMP?  Si Presidente Ferdinand Marcos Jr. misupak ug wala mosugot sa panawagan sa Senado nga suspensuhon ang implimentasyon sa PUVMP kay dako na og nagasto ang gobiyerno hasta mga transport operators para hunongon kini aron lang paboran kining pipila ka buok nga nagmagahi pagsanong sa modernisasyon.