Gugma sa pamilya ug dili sa kuwarta

Makatandog ang gipamahayag sa buotang Mark Andrew, amahan ni Olympic gold medalist Carlos Edriel ‘Caloy’ Yulo, nga dili importante alang niya ang daghang kuwarta kon ang katumbas niini mao man lang ang pagkaguba sa maayong relasiyon sa ilang pamilya. Matud niya: “Magulo pala pag ganito, pag marami kang pera.” Diin, iyang gibulgar nga ang pabilo sa away-panaglalis sa iyang asawa, Angelica Yulo ug ni Caloy, mao ang hinigugma niining si Chloe San Jose, Filipino-Astruallian, kinsa tungod sa kamoderna sa sininaan ug linihokan, wala magustoi ni Angelica. Kay basig mahurot lang kuno si Caloy.

Gisakitan si Andrew sa gipabuhugayng istorya ni Caloy sa Facebook, diin gihilabtan kuno sa inahan ang kuwarta niini sa banko gikan sa mga incentives ug premyong nadaog sa mga dinagkong gymnastic competition. Si Caloy miprangka, ‘wala sa gidak-on ug kagamay sa kantidad ang deperensiya. Kondili, ang prinsipyo. Nganong gihilabtan kini nga wala siya pahibaw-a?’ Gidepensahan sa amahan iyang misis. Wala kuno nila pasipad-i ang kuwarta ni Caloy. Gani, sa sinugdanan, P5M ra ang sulod niini. Hangtod nahimong P11M. Pero wala nila kini kawata. Ug midugang pagpasabot: “Kung nasa amin yong pera, sana umalis na kami sa looban. Sana may account na kami, may kotse na kami. Wala nga kami.”

Wala mangandoy si Mark og minilyong salapi. Gimingaw lang gyod siya sa malipayong panag-bondingbonding sa tibuok nilang pamilya sama niadtong 2019, diin dili pa sikat si Caloy. Maot hunahunaon, nga niining pagdaog ni Caloy og Olympics gold medals, inay magsadya tanang Pinoy ug mo-congratulate sa pamilyang Yulo, gipaaway hinuon sa atong mga kaigsuonang marites ang mag-inahan, kinsa pulos nagkapinasayloay na sa tagsatagsa nila ka sipyat. Kining halangdong kalamposang naabot ni Caloy, nagpruyba nga nagiyahan gyod siyag tarong sa iyang pobreng ginikanan. Giangkon ni Angelica nga walay perpektong inahan, anak ug pamilya. Busa, kon aduna man siyay nabuhat nga gikasakit sa anak, siya nangayog pasaylo. Nice acceptance. Makapasaludo! Apan mas saludo ko ni Andrew ug sa duruha nila ka anak, kinsa mitug-an nga wala sila mahangol sa minilyong salapi nga nadaog ni Caloy. Kay alang kanila, gugma sa pamilya ang ilang gipakamithi. Ug dili gugma sa kuwarta. Pagkatahom nga baroganan. Kapanaminan!