Nabisto nang baraha

Murag dili maayong tilimad-on sa bag-ong nilingkod nga acting City Police Director sa Cebu City Police Office kining nahitabong duha ka jewelry stores nga gidungan og tulis sa mga armadong lalaki diha sa may Carbon Public Market.

Si acting CCPO director Police Colonel Antonietto Cañete wala pay usa ka buwan milingkod isip hulip kang Police Colonel Ireneo Dalogdog, apan karon gisugat na kini og dakong pagsuway, ang pagsulbad sa maong pagpanulis sud sa 48-oras.

Si acting Cebu City mayor Raymund Alvin Garcia mihatag kaniya sa maong ultimatum human sa hitabo niadtong adlaw nga Huwebes dungan sa pagpasidaan nga nakataya sa kasulbaran sa maong kaso ang pangalan ni Cañete sanglit usa man kini sa lima nga gipapilian aron mamahimong permanenteng direktor sa CCPO.

Sa pagduaw ni Garcia sa CCPO kang Cañete pipila ka adlaw na ang nakalabay sa wala pa ang hitabo, mimando nga kinahanglang batasanon sa kapolisan ang pag-deploy gyud sa ilang mga tawo diha sa kadalanan, o police visibility, ug nihatag og ideya kun unsa nga klase sa director sa CCPO ang iyang gipangita, ang kahanas sa paghimo og crime solution.

Tuod man, naobserbahan nga pirme na gyung adunay mga polis sa kadalanan, apan naobserbahan sab nga naa sila sa mga karsada sayo sa buntag ug sa dayon nang mokilom-kilom o padung na gabii o peak hours.

Kini kay oras kini sa pagsulod sa trabaho o eskuyla ug tingpamauli sab ini og hapon padung gabii nga diin sagad sab kusog ang mga petty crimes.

Apan ang wala mapanaganahi kining bigtime nga mga tulisan, nga dili tawo ang puntariya kondili mga establisamento. Wala tingali magtuo ang kapolisan nga human sa peak hours duna pa gihapoy  mangursunada sa pagpanulis.

 Apan anang mga orasa ra sab nakakita og higayon kadtong mga tulisan pagtulis sa duha ka pawnshops pasado alas-9 sa buntag niadtong Huwebes. Ang peak hours magsugod alas-5 sa kaadlawon hangtud alas-8 sa buntag.

Wala nay tulisan nga mangahas  pagpanulis sa peak hours kay sayod silang dunay daghang polis nga naka-deploy. Maayo unta og usbon sa kapolisan ang ilang estratehiya ug tun-an pagbalik ang ilang crime efficiency solution basi sa crime clock ug mga lugar, establisamento nga humok biktimahon.