"Mona Lisa" gihapon ang theme song

Namahayag ang OIC sa Cebu City Medical Center nga si Dr. Peter Mancao nga magamit na ang mga hospital equipment nga segun sa mga state auditors nga wala pa magamit. Hinuon, sa pag-inspection sa mga state auditors niadtong Marso, nasuta nga ang mga makina anaa na sa testing phase.  Usa sa gitumbok nga rason ngano nga wala pa magamit ang mga ekipo mao nga wala pa mahuman sa hingpit ang hospital.  Hangtud nga dili mahuman ang CCMC, padayon’g mahikawan ang katawhan sa maayong serbisyo-medikal ug magpabilin gihapon ang theme song sa CCMC nga “Mona Lisa” kansang mga titik niini nagkanayon nga, “They just lie there, and they die there.” Fezteleern!

 Ayaw kalapas sa budget

Gipanalipdan ni suspended Mayor Michael Rama ang annual budget sa Cebu City sa tuig 2023 nga P50 billion sa pag-ingon nga wala kini mobutho gikan sa hangin lamang.  Gisaway ang maong budget sa mga state auditors tungod kay gibase kini sa usa ka “unrealistic” nga revenue projection.  Adunay basehan ang pagtakda sa budget ug kinahanglan nga moalayon ang tanang hingtungdang buhatan sa city hall aron makab-ot kini.  Ni’ng kahimtanga, haum ang panultihon nga, “Ang pag-budget aduna’y usa lamang ka lagda: Ayaw kalapas sa budget”.  Mao maan!

Buhat nga tuo-tuo

Gikataho nga adunay imahe sa Sto. Nino nga nagluha ang mga mata og dugo didto sa Sitio Tayud, Barangay Basak Pardo, Cebu City.  Gitoohan sa mga residente nga milagro ang maong panghitabo apan adunay miingon nga na-ihian lang sa iring ang imahe mao nga nabasa kini.  Daghan ang  nagtoo nga milagro ang maong panghitabo bisan walay bisan diyotay nga pag-imbestigar.  Angay silang pahinumduman sa panultihon nga, “Ang pagtuo nga wala magbilin og luna sa pagduda usa ka buhat nga tuo-tuo. Ug ang pagtuo-tuo maoy relihiyon sa mga mahuyang ang hunahuna.” Muleeng!

Basin dunay mapagan

Namahayag si Acting Mayor Raymond Alvin Garcia nga walay ilusad nga imbestigasyon alang sa pagsuta kon kinsay tag-sala sa sayop nga paglinya sa CCSC track oval.  Alang sa Acting Mayor, walay mapa-ingnan ang imbestigasyon kay magtukmod-tukmod ra man unya ang contractor, ang marker ug ang technical committee.  Husto ang Acting Mayor ni’ng iyang hukom.  Ang angayan buhaton mao nga ayohon na lang ang track oval aron mahasubay na kini sa standard.  Matud pa sa akong amigo, “Kon pugson gyud pagpahigayon ang imbestigasyon, basin baya adunay daghan’g “sibilyan” nga mapagan.” Hala no!

Magtindera na lang

Usa ka bulan na lang una moabot ang deadline apan 9 porsiyento pa lang sa 22,323 ka bakanteng position sa mga magtutudlo ang nafill-upan sa DepEd.  Maingon nato nga naglisod gayod ang DepEd sa pagpang-recruit og mga magtutudlo.  Tungod ba kaha kay anaa pa gihapon ang padrino system sa pag-hire mao nga kadtong walay mga padrino dili gayod makasulod.  Busa kadtong dili mahire motrabaho na lang sa mga call center samtang ang uban nga medyo kulang sa diskarte, mag-tindera na lang sa department store.  Pagkatoytoy!