Anugon ang serbisyo

Kadaghan gud diay sa mga polis nga gidestino paghatag og proteksyon kang Vice President Sara Duterte? Miabot man diay og 75 ka polis ang gipangdestino kang Inday Sara.

Nahibaw-an ni kay ang hepe sa Philippine National Police (PNP) nga si General Rommel Marbil mimando nga kuhaon ang tanang polis nga gidestino pagbantay ni Sara.

Sigurado hinuon ko nga dunay nagmando ni General Marbil nga labaw pa kaniya’g ranggo aron kuhaon ang tanang polis nga nadestino paghatag og proteksyon sa vice president.

Kon 75 ka polis nga gidestino kang Inday Sara, kang Presidente Bongbong Marcos, pila sab kaha? Ang publiko nagkinahanglan og mga polis, apan gigamit ra diay ni sa mga politiko.

Ang presidente ug vice president duna silay mga sakop sa Presidential Security Group (PSG) nga nagbantay, apan nganong may 75 pa man gyud ka polis nga nadesytino kang Inday Sara?

Kon gidestino pa sila sa mga police stations ug gitahasan sa pagpatrolya sa mga dapit nga sagad anha manghitabo ang krimen, tingali makatabang pa sila nga mous-os ang crime rate.

Angay sab nga ang mga polis nga nagbantay kang Presidente Bongbong, kuhaon sab, kay naa may mga PSG nga nag-secure sa presidente ug vice president.

Maayong kuhaon sab ni PNP Chief Ambil ang mga polis nga gidestino isip escort, ug kadtong gipabantay sa mga balay sa dagkong politiko ug ubang sa nasud.

Kon gidestino pa sa foot patrol ang maong mga polis, napahimuslan unta sa katawhan ang ilang mga serbisyo, dili kay nagsilbi ra silang gwardya sa vice president.

* * *

Giklaro na gyud ni Cebu City Acting Mayor Raymond Garcia nga magkabuwag na gyud ang dalan nilang “preventively suspended” Mayor Michael Rama.

Gitug-an ni Acting Mayor Garcia namong mga City Hall consultants nga molansar siya pagka mayor sa Cebu City sa eleksiyon karong Mayo sa sunod tuig.

Matud ni Raymond nga nakahukom siya niini kay nabasa niya ang balita nga si Rama magpapili pagbalik pagka mayor, ug ang iyang running mate dili na Garcia, kondili si Konsehal ug karon Cebu City Acting Vice Mayor Dondon Hontiveros.

Dugay ra kami nga nagtuo nga molansar gyud si Raymond pagka mayor, apan kutob ra sa mga tabi-tabi. Kagahapon, gitug-anan mi ni Raymond sa iyang nahukman.

Gikuyawan ko sa sangpotan niini kay dili ba kaha mohuyang ang popularity rating nilang Rama ug Garcia? Sigurado nga mabuak man gyud ang botos nga para gyud unta kanilang duha.

Paabot ta sa kalamboan sa politika dinhi sa Cebu City.