Common sense

Ting-uwan na. Makasinati na sab ta niini og mga paglunop ug pagbaha. Wa pa ko malimot nga diha’y higayon nga miawas ang sapa dapit sa General Maxilom Avenue atubangan sa Lighthouse.

Dili imposible nga moabot ang higayon nga kon way himoon ang atong mga opisyal nga gitugyanan sa pag-atiman sa mga sapa, maglunop na usab dihang dapita.

Ambot nganong dili man gyud sila makakita kon unsay angay’ng buhaton aron nga malikayan ang problema sa pag-awas sa atong kasapaan.

Tan-awa ra gud ang sapa nga kabahin sa Lahug River nga anaa mag-agi sa taytayan sa San Jose Street. Migamay ang gidak-on sa sapa kay nagliundok ang daw bungtod nga lapok.

Nganong wa man gyud kana habwai sa mga lapok ang maong bahin sa sapa? Kon mokusog ang bul-og sa baha, moawas na sab ang tubig ngadto sa karsada.

Inig-awas sa tubig ngadto sa karsada, laing problema ang mamugna, grabeng problema sa traffic kay ang mga sakyanan dili na man makaagi diha sa General Maxilom Avenue.

Unta, mahunahunaan kini sa mga hingtungdang opisyal nga habwaan gyud dayon ang maong bahin sa sapa, ug ang uban pa nga kasapaan nga susama niini og sitwasyon.

* * *

Nindot unta kon si Cebu City Acting Mayor Raymond Alvin Garcia magmugna og “special task force” nga tahasan sa pagpanapak sa mga libaong sa karsada dinhi sa siyudad.

Dili lang unta masuko ang mga amigo nako sa Department of Engineering and Public Works (DEPW), apan ingnon nako sila nga nagmika sila sa pag-atiman sa libaongon nga karsada.

Kami sa Cebu City Traffic Management Board, gusto gyud nga maatiman dayon ang mga libaong sa karsada kay mao ni ang rason nga usahay makamugna og aksidente, sa tantong paglihay-lihay sa mga driver sa mga libaong.

Duna sa’y ubang mga kahoy nga angay na’ng pul-ongan sa mga sanga nga anaa na nagyungyong sa karsada, ug hinungdan nga dili na moagi ang mga sakyanan sa daplin, magpatunga na.

Dunay mga nagyungyong nga mga sanga sa kahoy nga nakatabon na sa mga traffic signage, hinungdan nga ang mga driver dili na makakita kon unsay balaod sa trapiko nga angay’ng tumanon dihang dapita.

Ang ubang mga nagyungyong nga mga sanga sa kahoy, naghatag kini og landong, apan nakaaghat kini sa mga driver og habal-habal nga anha magpunsisok ug magpaabot og pasahero bisan og gidili dihang dapita.

Mangutana mo og asa kini dapit? Usa niini kanang kahoy nga anaa daplin sa karsada sa dili pa ang Lahug Market sa Veterans Drive. Daghan kaayo ni kon mag-inabtik lang ang mga mata sa mga hingtungdan.