Political dynasty idili

Gipalabang na sa hawanan sa Senado ang balaudnon nga gipangamahanan ni Senador Robin Padilla nga nagtingoha sa pagpatuman sa provision sa Batakang Balaud nga nagdili sa political dynasty dinhi sa nasud.

Lain na usab kini nga pagsuway sa Kongreso sa pagdili sa political dynasty nga sulod na sa dugay nga panahon wala gayod makalusot sa Kongreso sa Pilipinas.

Klaro ug tataw kaayo nga wala itugot sa Batakang Balaud ang political dynasty apan ang pagdili niini gikinahanglan pa nga ipalabang sa Kongreso. Buot ipasabot gikinahanglan pa ang balaud nga magdili niini sa hingpit.

Ang atong Batakang Balaud adunay duha ka klase sa provision, ang gitawag nga self-executing ug non-self-executing provision. Ang kalainan niining duha sayon nimong makita ug mailhan pinaagi sa pagtanaw kun ang provision may nakabutang ban ga “as may be provided by law.” Kun anaa gani kini sa provision, nagpasabot kini nga nanginahanglan pa kini og balaud nga ipalabang sa Kongreso kay non-self-executing ang maong provision.

Kay nanginahanglan pa og balaud nga ipalabang sa Kongreso, ang anti-political dynasty provision sa atong batakang balaud wala gayod mapatuman tungod kay kasagaran sa mga magbabalaud dinhi sa nasud halos nagmugna og political dynasty.

Apan kun imo nga palawman sa pagsabot ug bukikion og maayo, dili nimo puwede nga did-an ang mga politiko sa pagmugna og iyang kaugalingon nga political dynasty kana tungod kay dili sila ang nagmugna niini. Ang nagmugna sa political dynasty mao ang mga botante.

Kun ugaling walay tingog ang mga magbabalaud sa political dynasty puwede ra gyud sila nga dili motingog kay aduna pay katawhan nga maoy motingog mahitungod niini.

Kay ang katawhan man ang nagmugna sa political dynasty sila rapod ang makaguba niini pinaagi sa dili na pagpili sa mga kandidato nga mao ra gihapon nga apilyido sa ubang kandidato.

Dako ang akong pagtoo nga ang gipalabang nga anti-political dynasty nga balaudnon dili gihapon makalusot busa ang katawhan na ang mohimo sa pagpalusot niini.