Inday sa pagpa-buhagay gisaway
Ngano bang miresayin man si Vice Preisdent Sara ‘Inday’ Z. Duterte sa gabinite ni Presidente Bongbong Marcos Jr. (PBBM)? Kini matubag sa ilang mga inadlaw’ng binuhatan kon giunsa sa matag usa kanila ang pagpangalagad sa katawhan?
Paglingkod pa lamang ni Inday, miabli gilayon siyag Office of the President’s satellites sa Luzon, Visayas ug Mindanao aron ang iyang serbisyo mao nay mopaduol sa katawhan ug dili na moadto sa kaulohan, diin makagasto pa’g dako (ilabi na ning panahon nga ang plitehan ug ang mga presyo sa pagkaon mimahal na pag-ayo.
Sa iyang pagka-co-chairman sa ELCAC, todo niyang gisuportahan ang hingpit pagpuo sa CPP-NPA-NDF ug tanang matang sa terorista. Sa iyang pagka-DepEd secretary, gibisitahan dayon niya ang mga eskuylahan, nakighimamat-nakighinabi sa mga magtutudlo ug kabataan aron masayran ilang mga suliran, diin siya naningkamot nga mahatagan kinig tukmang kasulbaran.
Ang K-12 Education System nga nakadugang rag dakong kahasol-galastohan sa mga ginikanan, gipabalik ni Inday sa kanhi unsay naandan, Unya, gihatagan pa ang tanang public teachers og 30-day leave with no volunteer work. Pudyot lamang kini sa daghan nang kaayohan nga nahimo ni Inday sa katawhan.
Samtang si PBBM, unsa bay iyang ikapanghambog? Ang pagsige’g party-party? Ang pagpunay’g state visit, diin inay makakabig og foreign investors, ang mga dagkong magpapatigayon na hinuoy namiya sa Pilipinas? Wala matuman ni PBBM ang unsay iyang gisaad sa katawhan.
Ug mao kini ang nakalahi nilang duha: si Inday naningkamot nga makabangon pagbalk ang atong tabangonong nasod, sumala sa unsay ilang gisaad. Samtang si PBBM, gitiwasan hinuon atong kalisod!
Kini mao ang nakapabuak sa ilang kanhi BBM-SARA Uniteam. Busa dili ikahibulong kon nakadesisyon si Inday nga dili mo-attend sa July 22, 2024 SONA ni PBBM. Diin, siya mipabuhagay pag dula-pulong: “I’m appointing myself as designated survivor.” Nga nakapaukay pag-ayo sa mga alipores ni PBBM nga anaa sa House of Congress, kinsa puwerting nakasaway ug mitambag nga dili pasigehog tan-aw si Inday sa salida sa Netflix.
Pastilan, salida ra man diay. Sa ato pa dili tinuod. Unya nganong maghunahuna pa mag dautan? Ikaduha, kamatayon ra bay makapatalsik sa presidente? Hinumdomi kuno, kon giunsa ug kinsay nakapakanaog ni anhing Pres. Ferdinand E. Marcos Sr. sa puwesto?
- Latest
