Di angay sawayon

Dili angay’ng sawayon si Cebu City Mayor Michael Rama nga mihimo og “People’s Address” aron pagpahibawo sa katawhan sa iyang mga nahimo dihang wa pa siya masuspenso kaniadtong tungatunga sa Mayo.

Duna man gu’y uban nga nanaway kay ngano man kuno nga si Rama mihimo pa og mensahe nga susama sa State of the City Address (SOCA) nga suspendido pa man siya pagka mayor.

Giangkon ni Mayor Rama nga suspendido pa siya sa katungdanan karon, apan gusto lang usab niya nga ipahibawo ang iyang mga nahimo atol sa modul-an sa lima ka buwan karong tuiga.

* * *

Daygon nako si Kalunasan Barangay Kapitan Carlitos Ceniza kon barugan niya ang iyang hukom nga dili dawaton ang pag-appoint kaniya ni Presidente Bongbong Marcos isip Assistant Secretary sa National Anti-Poverty Commission.

Klaro hinuon kaayo nga kining pag-appoint ni Bongbong ni Kapitan Ceniza agi lang ni og ganti kaniya kay siya man maoy vice president for the Visayas sa Partido Federal ng Pilipinas, ang partido nga gigamit ni Bongbong pagdagan niya pagka presidente.

Ang rason ni Ceniza nga dili modawat sa gitanyag kaniya kay uwahi na ang pagtudlo kaniya sa maong katungdanan. Matud ni Ceniza nga nagpaabot siya nga itudlo og katungdanan sa kagamhanan sa wa pa ang eleksiyon sa barangay.

Pero kay miabot na lang ang eleksiyon sa barangay wa man siya gitudlo og katungdanan sa kagamhanan, milansar siya sa pagka kapitan, ug midaog.

Matud ni Kapitan Ceniza nga gitan-aw niya ang pagsuporta kaniya sa katawhan nga nagpaabot sa tinuoray’ng serbisyo, ug mao kini ang nakapugong kaniya pagdawat sa gitanyag nga pwesto.

Samtang tuod mas dako ang iyang responsibilidad nga makatabang sa mga kabus, dili lang sa Sugbo, apan nahunahuna niya nga dili maayong talikdan ang mga tawo nga mibotar kaniya ug nagpaabot sa iyang tinuoray’ng serbisyo.

Mao ni ang matang sa tawo nga akong saludohan. Dili sama sa uban nga bisan og nakadaog na sa pwesto sa kagamhanan, moundang sa serbisyo kay motrabaho og laing katungdanan nga mas dako og sweldo.

Akong napanglantawan nga kini si Kapitan Ceniza mao ni ang mosunod nga presidente sa Association of Barangay Councils (ABC) kon si Konsehal Franklyn Ong modagan pagka konsehal sa siyudad, o kaha vice mayor sa eleksyon karong sunod tuig.

Dinhi sa Dakbayan sa Sugbo, kulbahinam ang kamada sa mga nagtinguha nga modagan sa pagka mayor ug bise mayor, ug hangtud karon padayon pa silang nagpaniid kinsa ang mas lig-on aron maoy iapil sa “short list” sa mga kandidato.

Ang ako lang gyud unta nga sila si Mayor Rama ug Acting Cebu City Mayor Raymond Alvin Garcia dili lang pagkabuwag sa ilang mga dalan sa politika.