Mga demonyo sa kasuko

Kining maong mga demonyo ang modumala ug mokontrolar sa mga tawo nga dunay isyu sa kasuko.

Kining maong mga tawo ang makalimot sa ilang kaugalingon, ug makabuhat og mga pintas nga mga lakang ingon man makabungat og mga pulong masakit gumikan sa ilang kasuko. Ang ilang mga mata kun kini mosiga o molisik nagpaila man nga sila nasudlan ug gikontrolar sa mga demonyo sa kasuko.  Kun dili kita magmabinantayon mahimong gamiton ingon nga kahimanan ang mga tawo nga nalambigit sa hingtungdan.

Lakip na niini ang mga sakop sa pamilya, mga higala ug uban pa. Dakong kalipay sa mga demonyo labina kun anaa na ang kagubot gumikan sa kasuko. Ila kining sugnoran. Ila kining padilaabon hangtud nga dilli na mabantayan nga dunay mga butang nga nahimo nga makalilisang kaayo. Daghang nakapatay gumikan sa kasuko ug human mapawong ang aligato sa kasuko, anaa na ang pagmahay. Igo na lamang mopatulo sa luha ang matag usa apan walay pagbasol nga mahiuna.

Unsay angay himoon?

1. Angkona nga ang demonyo ug dautang Espiritu dili lamang molihok sa tinagsa nga pamaagi. (individual) mahimo siyang molihok diha sa pundok ug kahugpongan sama sa pamilya, organisasyon ug uban pa.

2. Kun atong tugotan nga ang kasuko maoy mamahimong taytayan sa kaungkagan, mas isog nga mopadayag ang demonyo diha sa kinabuhi natong mga tawo.

3. Adunay kitay panghunahuna ug kagawasan. Sa atong hunahuna atong palipangon ang maayong panghunahuna ug dili ang dautang hunahuna gumikan sa kasuko. Dugang pa, gamiton nato ang atong kagawasan nga sa ato pa, pilion nato ang paghigugma kaysa pagdumot.

4. Dili tanang hitabo ug panghagit angayan tubayan. Sa akong bahin kun ako masuko na gyud kaayo, mas pilion nako nga mopalayo na lamang ug magpakahilom. Akong ipadayag ang akong kasuko sa dili pintas nga paagi. Kay matud pa: “Kun masuko ka, ayaw gyud pagpakasala!”

5. Ang paagi sa pagbuntog sa kasuko pinaagi man sa gugma, kaluoy ug kalinaw diha ni Kristo. Tinuod lisud kini himoon apan walay dili mahimo tinabangan sa grasya sa Dios!