Maayo ba ni?

Duna diay ko’y isyu nga ipaambit kaninyo, nga naglambigit sa kompaniya nga RUSI, tigbaligya og mga motorsiklo.

Tingali ang ilang paagi nga kon may mopalit kanila og motor bisan pinaagi sa data-data nga pagbayad, iparehistro na nila ang motor sa ngalan sa nag-installment.

Karon, kon mahitabo nga ang mipalit pinaagi sa installment dili na modayon sa pagbayad, kuhaon nila ang motor ug ibaligya nila sa lain.

Usa ko sa nakapalit og segunda-mano nga motor gikan sa RUSI. Nagtinarong gyud ko sa pagbayad hangtud nga naimpas ang akong bayranan.

Apan nahibu’ng ko kay igo ra man nilang gihatag nako ang original nga Certificate of Registration (CR) sa motor, nga anaa gihapon sa ngalan sa unang nakapalit.

Angay unta nga sila maoy moparehistro sa motor ngadto sa LTO nga ubos na sa akong ngalan. Pwerteng problemana niini karon kay duna ra bay bag-ong balaod karon ang LTO.

Ikaduha, dili ko makabasta-basta sa pagsusi sa records sa motor nga akong napalit gikan sa RUSI kay didto nila kini giparehistro sa Luzon, sa Region-2.

Hangyoon nako ang tagdumala sa RUSI nga asikasohon nila ang mga dukomento sa motor nga naimpas na nako pagbayad gikan kanila.

Kon dili man gani ninyo kini asikasohon, awhagon nako kadtong nagtinguha nga moangkon og motor nga segunda mano nga ayaw mo diha sa RUSI kay maproblema gyud mo.

   * * *

Dunay bag-ong kamandoan gikan ni LTO Chief Vigor Mendoza nga silotan kadtong mamaligya og mga sakyanan, o kaha moprenda nga dili magpahibawo sa Land Transportation Office. Hinuon matud sa LTO Chief nga aron dili kaayo hasol sa mga tag-iya’g sakyanan, mahimong ang pagrehistro ipaagi na sa online.

Bitaw, kana nindot kaayo nga plano ni Mendoza kay sus, dugaya kon moadto ka sa opisina sa LTO. Usahay pa ini'g adto nimo, Offline, nagpasabot nga dili ka maatiman.

Nindot kaayo ang tinguha ni Mendoza kay gitumong kini aron kon unsa ang nga’n nga anaa sa CR, mao gyud ang tinuod nga tag-iya.

Kay karon, pwerteng daghana nga mga sakyanan nga ang nga’n nga anaa sa CR, dili na maoy tag-iya kay nabaligya na, ug lainlaing tawo na ang nakapalit.

Bitaw, pananglitan ang usa ka sakyanan nakadasmag, unya misibat ang nag-drive apan dunay nakatimaan sa plaka, ang rehistradong tag-iya maoy mapatawag, pero nabaligya na diay. Kon maayo lang modumala ang usa ka pangulo sa departamento, mamaayo man gyud ang serbisyo. Pero kon ang gihunahuna mao ra nga makakwarta, wa gyuy ayo.

Kinahanglang dili sab dugayon ang paghatag sa mga plaka sa mga sakyanan. Maayo man gani nga inig-rehistro, anaa dayon ang plaka.