Expansion sa Guba hospital walay building permit

Pastilan napulo ka tuig na ang nakalabay dihang gisugdan ang expansion building sa tambalanan sa bukid niadtong tuig 2014 apan hangtud karon wala pa hanuman ug wala pa gyud mapahimusli sa katawhan tungod kay walay building permit.

Gigahinan og P45 million ang proyekto, ang ground floor ug second floor, gikan sa pundo sa Department of Health. Apan nahulog ra man sa walay gipadulngan ang proyekto tungod kay daghan kaayo ang mga nakababag niini. Nahunong ang trabaho dihang niabot ang pandemic ug kaupat na kuno mag ilis og kontraktor.

Hinuon ang phase one o ang ground floor nahuman na gyud ug andam na ganing gamiton isip mga buhatan o laboratory sa tambalanan. Ang problema kay walay certificate of occupancy sanglit wala man silay building permit.

Gikompirmar ni Architect Florante Catalan, ang hepe sa OBO, nga wala gyuy mi-apply sa ilang buhatan og building permit sa expansion building sa Guba Community Hospital hangtud nga naabot na gani kuno kini sa legal diin gipasakaan og illegal construction ang contractor ug mipagawas usab sila og stoppage order sa trabaho kay wala man mo-comply sa rekisitos.

Sayon ra man unta kaayo ang pagkuha og building permit matud ni Catalan dili ra kaabtan og usa ka oras basta kompleto ang papeles apan nganong wala man kini maproseso? Ang contractor mao man unta ang mokuha niini nganong wala man mohimo bisan first move man lang nga mao ang pag apply?

Natribokar kini karon dihang misuroy si Acting Mayor Raymond Alvin Garcia sa tambalanan kinsa dako ang iyang kadismaya kay naa na ang expansion, magamit na unta apan dili gihapon maposlan tungod sa mga technicalities nga mitumaw.

Sa kataas sa panahon nga pagtrabaho sa multimillion pesos nga proyekto nganong wala man ni mahan-ay og tarong sa DOH? Unta kong dunay legal question ilabi na sa land ownership unta ila kining giplantsa ayha sila mipagawas og pundo nga kwarta aron segurado gyud nga walay sabod sa programa.

Dihang gikuhaan nako og side ang DOH wala pay available nga motubag sa issue, ang contractor usab wala motubag sa katin-awan nganong wala man sila mokuha og building permit.

Murag gaduwa duwa ra man intawon gamit ang kwarta sa katawhan, sayang kaayo nga unta napahimuslan kini sa mga tawo nga anaa intawon sa kabukiran nga lisod ang access sa dagkong tambalanan nga anaa sa sentro sa syudad.

In fairness sa Guba Community Hospital maayo ang ilang serbisyo, anaa na silay laboratory services ug bisan minor surgery makahimo na sila, apan kuwang ang ilang kapahilunaan sa mga pasyente tungod kay dili pa man magamit ang gihandum unta nga kalamboan sa ilang tambalanan.

Unta maplantsa na ang tanan ug hingpit mahuman ang proyekto ug mapahimuslan na sa mga tawo.