Kanal

Nag-ungaw sa piligro ug padayong nakigbugno alang sa iyang kinabuhi sulod sa ICU sa usa ka tambalanan dinhi sa dakbayan sa Sugbo si Reynaldo Patalinghog human siya mahagbong sa lawom nga kanal diha sa Pasil Fish Market tulo ka semana na ang nakalabay.

Sa iyang privilege speech sa konseho niadtong Miyerkules, gihisgutan ni Konsehal Jun Alcover ang nahitabo ni Patalinghog. Matud ni Alcover, nitawag ug nangayog tabang niya ang pamilya ni Patalinghog niadtong Abril 22 dihang kalit ni nga nahagbong sa kanal samtang naglakaw.

Tungod sa kalawom sa kanal nga gibiyaan sa kontraktor nga way tabon labihan ka dako sa kadaot nga nahiaguman sa biktima. Sigun ni Alcover, dunay samad ang atay sa biktima, naapektuhan sab ang kidney niini ug dunay duha ka gusok nga nabali ug nagkinahanglan na og dialysis ang biktima.

Nahibaw-an ni Konsehal Alcover nga si Patalinghog dili maoy unang biktima sa pagpasagad sa kontraktor ug sa mga hingtungdang opisyal sa gobyerno. Gikatahong siya maoy ika-pito na nga nahagbong sa samang kanal diha sa Pasil Fish Market.

Human sa privilege speech ni Alcover, mipalabang ang konseho sa dakbayan og usa ka resolusyon nag-awhag sa Department of Engineering and Public Works (DEPW) pagsusi sa tanang kanal dinhi sa dakbayan.

Giimbitar sab sa konseho alang sa usa ka executive session ang mga opisyal sa DEPW, Department of Public Works and Highways (DPWH), Cebu City District Engineering Office, Cebu City Market Office, kapitan sa Barangay Pasil, ug ang mga lab-asero sa Pasil aron hisgutan ang problema sa tinguha nga malikayan ang dugang aksidente.

Husto ang gihimo sa konseho nga pagpatawag sa mga stakeholders apan hinaot dili lang kutob sa executive session ang ilang buhaton. Angayang tugkaron sa konseho kinsay mga tawo nga responsible sa proyekto ug kun nganong gipasagdan nga way tabon ang kanal nga naghatag og dakong peligro sa publiko.

Gikinahanglang manubag ang mga tawo nga nagpabaya sa ilang responsibilidad ug kun gikinahanglan i-ban ang contractor sa proyekto pagsalmot sa umaabot nga mga bidding sa proyekto sa dakbayan.

Kun tinuod nga pito na ka tawo ang nahagbong sa maong kanal, tataw nga dunay nagpabaya sa ilang responsibilidad. Bisan ang mga opisyal sa barangay ug ang market administrator angayang manubag sa ilang kapakyas paghimo og dinaliang aksiyon sa problema sa unang higayon pa lang nga dunay nadisgrasya.

* * *

Nabantok nang karsada sa akong pagpunay og balik sa Satellite Office sa Land Transportation Office (LTO) diha sa Robinson’s Fuente aron pagsusi mahimo na bang makuha ang ID card sa akong driver’s license.

Dugay nako nga naka renew sa akong lisensiya apan igo lang kong gihatagan og papel nga print out kay wa pa silay card nga available atol sa akong pag-renew. Naapektuhan man gud sila atol sa maong higayon sa kagubot didto sa kaulohan sa card supplier sa LTO ug nakasabot ko niini.

Apan dugay nang niingon si LTO chief Vigor Mendoza nga duna na silay available nga mga card. Ang problema sa Satellite Office sa LTO diha sa Robinson’s Fuente mao ang ilang machine printer. Sigun sa staff nga akong gipangutana dugay na silang nagrequest sa Manila apan wa pa silang tubaga.

Di sab ka mahimong moadto sa laing branch sa LTO aron mangayo og ID card tungod kay ilang lagda nga kun diin ka nag-renew adto raka mahimong mangayo og ID. Ambot kanus-a masulbad ang ka-inutil niining maong ahensiya!