EDITORYAL - Uso karon sa suspensiyon

Gisuspenso og unom ka buwan si Cebu City Mayor Michael Rama sa Visayas Ombudsman may kalabotan sa kasong gisang-at batok kaniya ug sa laing pito ka opisyales sa city hall sa upat ka mga empleyado nga giingong napulo ka bulang wala sweldohi.

Kaning hitaboa, preventive suspension gyud kini, apan kinahanlan pa hinuon nga adunay representante sa city hall o ba kaha sa mismong mga gipangsuspenso nga modawat sa opisyal sa dokumento aron matawag nga epektibo ng gituman ang kamanduan.

Samtang daghan ang naintriga niini dinhi sa Cebu City, dili kini panghitabo sa kinabuhi sa mga local chief executives dinhi sa Pilipinas. Nauso naman kini pirme matag hapit na ang eleksyon.

Sa tulo ka tuig nga termino aning mga lokal nga mga opisyales, anha gyud pirme mogawas ang mga suspension ini og hapit na mangandam sa sunod nga kampanya sa eleksyon. Mura og tinuyo gyud ba, mao nga bisan yanong tawo, dili kinahanglang nasuhito sa abogasya o politika makasabot gyud  nga may bulok politika ang motibo aning mga sirkumstansiyaha.

Dili pwedeng basulon ang Ombudsman o bisan unsang investigative body nga matunong gyud aning mga naghinangat na ang eleksyon sila mopagawas og resolusyon o kamandoan, kay nagbase ra man sab kini sa giduso kanila nga reklamo sa mga nagreklamo.

Kung magpanuko sila sa pag-imbestigar o ba kaha naikog pag-imbestigar kay kaila, o ba kaha konsiderasyon nalang kay hapit na ang kampanya para sa eleksyon, sila man say mabuthan sa publiko ilabi na sa mga nagreklamo.

Kuyaw man sab silay pasanginlan nga dunay gidapigan. Maayo lang gyud unta kun kani tanang mga gisang-at nga mga reklamo maaksyonan sab dayon, bahala pa og kontra-partido sa presidente o kaalyado aron way dudahan.

Hinuon, dili na kini bag-o kang Rama, kay kaniadto gisuspenso man sab siya sa dihang padung na sab ang eleksyon.

Kaniadto gisuspenso siya tungod sa paghatag og bonus sa mga kawani sa City Hall, karon gisuspenso na sab siya kay naay mga kawani nga wala sweldohi og napulo ka bulan. Dili lang si Rama maoy naa sa kasamtangang sitwasyon karon, daghan sab nga mga lokal nga opisyales ang gipansuspenso sab karong mga panahona kay mao ni uso karon.